توركیا : فەرەنسا بۆی نییە ئامۆژگاریان بكات

هەینی, 02 شوبات 2018 06:21

 

 

وەزیری دەرەوەی توركیا وێرای داخوازی سوریا بۆ دەست پێكردنی دانووستانەكان لەگەڵ بەرهەڵستكارانی سوری، بۆ سەرۆك كۆماری فەرەنسا وتی: پاریس بۆی نییە ئامۆژگاری ئێمە بكات.

رۆژنامەی دەیلی سەباح، (مەولود چاوش ئۆغڵۆ) وەزیری دەرەوەی توركیا رایگەیاندووە: ئەوان ڕەزامەندیان دەربڕیوە بۆ ئەنجامدانی دانیشتنی كۆنگرەی نیشتمانی سوریا لە شاری سۆچی ڕووسیا، خوازیاری دەسپێكی دانووستانی دەوڵەتی یاسایی سوریا لەگەڵ بەرهەڵستكاران سەبارەت بە داهاتووی ئەو وڵاتە بوو.

وەزیری دەرەوەی توركیا وتیشی: ئەو پڕۆسەیە (دانوستانەكانی سۆچی) گرێی خواردووە بە پڕۆسەی دانوستانەكانی جنێڤ، هەر بۆیە سوریاش دەبێ دانووستانەكان بۆ هەمواركردنی دەستوور، بەڕێوەبردنی هەڵبژاردنەكان و پێكهێنانی دەوڵەتی گواستنەوەیی دەست پێبكات.

ناوبراو لە بەشێكی دیكەی لێدوانەكەیدا لە كاردانەوە بە هۆشداری (ئیمانوێل ماكرۆن) سەرۆك كۆماری فەرەنسا بە توركیا سەبارەت بە ئۆپەراسیۆنی ئێستای ئەنقەرە لە خاكی سوریا ناسراو بە (چڵی زەیتوون) ڕایگەیاند: پاریس بۆی نییە ئامۆژگاری ئەنقەرە بكات.

(بینالی یەڵدرم) سەرۆك وەزیرانی توركیاش رۆژی ڕابردوو بەبێ ئاماژە بە درێژەی ئۆپەراسیۆنی سەربازی سوپای ئەو وڵاتە لە خاكی سوریا كە بە پێچەوانەی هاوكێشە نێودەوڵەتییەكان و بەبێ مۆڵەتی یاسایی دیمەشق ئەنجام دەدرێت، وتبووی: هەموو جیهان ئەوە دەزانێت و دەبێ بزانێت كە توركیا بە هیچ شێوەیەك بە لۆژیكی داگیركاری هەنگاو ناهاوێژێت و ماكرۆن تێگەیشتنێكی لاوازانەی لە شەڕی توركیا لە گەڵ تیرۆر هەیە.

ئەوە لە كاتێكدایە كە (ئیمانوێل ماكرۆن) سەرۆك كۆماری فەرەنسا رۆژی ڕابردوو لە لێدوانێك بۆ فیگارۆ، سەبارەت بەوەی كە ئەنقەرە لە ئۆپەراسیۆنی عەفرین وەك بیانوویەك بۆ هێرش كردنە سەر سوریا كەڵك وەردەگرێت، هۆشداری دابووە توركیاو داوای لەو وڵاتە كردبوو كە بە هاوئاهەنگی لەگەڵ هاوپەیمانانی هەنگاو بنێت.

ماكرۆن ڕاشیگەیاندبوو: ئەگەر دەركەوێت كە ئەو ئۆپەراسیۆنە ئامانجێكی جگە لە بەرەنگاربوونەوەی هەڕەشەی تیرۆر لە سنوورەكانی توركیادا هەبێت و ببێتە ئۆپەراسیۆنێكی هێرشبەرانە لەسەر بنەمای داگیركاری، ئەوكات وەك كێشەیەكی راستەقینە لێی دەڕوانین.

ماكرۆن هەروەها لە بڕیاری خۆی بۆ گفتوگۆ لەگەڵ (ڕەجەب تەیب ئەردوگان) هاوتای توركی خۆی هەواڵی داوەو دەڵێت: دەركەوتەی ئەو ئۆپەراسیۆنە نیشاندەری زەروورەتی دانووستان لەگەڵ یەكێتی ئەوروپاو هەروەها هاوپەیمانانی دیكەیە.

شایانی باسە كە سوپای توركیا بۆ هەفتەی دووەم ئۆپەراسیۆنێكی سەربازی لە دژی كوردەكانی باكوری سوریا لە ژێر ناوی (لقی زەیتوون) دەست پێكردووە كە بە پێچەوانەی هاوكێشە نێودەوڵەتییەكان و بەبێ مۆڵەتی دەوڵەتی یاسایی سوریایە.

ئەوە لە كاتێكدایە كە دەوڵەتی سوریا پێشتر سەبارەت بە پێشێلكرانی هەرێمی ئاسمانی و تەواوەتی سەرزەوینی ئەو وڵاتە لەلایەن توركیاوە هۆشداری دابووەو ئەو هەڵمەتەی توركیای بە (دەستدرێژی) بۆ سەر وڵاتەكەی زانیبوو.