جەمیل بایك: ڕوسیا و ئەمریكا، كورد دەكەنە قوربانی و ئەوروپاش دووڕوووە

شەممە, 03 شوبات 2018 08:59

 

بایك جەمیل بایك، هاوسەرۆكی كۆنسەی بەڕێوبەری كۆما جڤاكێن كوردستان- ناسرا بە كەجەكە، هێرشی توند دەكاتە سەر هەریەكە لە ئەمریكا و ڕوسیا و تۆمتباریان دەكات بەوەی كورد دەكەنە قوربانی بۆ ئامانجەكانی خۆیان و دوپاتیشی دەكاتەوە ئەردۆگان هیچ پەیوەندیەكی بە ئیسلامەوە نیە.

جەمیل بایك لەمیانەی چاوپێكەوتنێكیدا لەگەڵ میدیای فەرمی پەكەكە ووتی: لە ئێستادا حكومەتی توركیا بەنیازی لە ناوبردنی گەلی كورد دوژمنایەتی دەكات و سیاسەتی گۆشەگیریشی بە سەر ڕێبەر ئاپۆدا سەپاندووە،ئەو هێرشەی دەكرێتە سەر عەفرین هاوشێوەی هەمان سیاسەتە كە بە سەر ڕێبەر ئاپۆ دا سەپێدنراوە"

جەمیل بایك وتیشی: ئەردۆغان هیچ پەیوەندییەكی بە ئیسلامەوە نییە، ئەو ئیسلام وەك پەردەیەك بە كار دێنێت، ئێستا بانگەشەی ئەوە دەكەن كە بۆ كۆمەڵكوژی نەچوون و دەیانەوێت ئارامی ناوچەكە بپارێزن، لە هیچ شوێنێ سوریا ئارامی نییە جگە لە عەفرین، بۆیە هێرشی توركیا بۆ سەر عەفرین نەك بۆ پاراستنی ئارامی بەڵكو بۆ تێكدانی ئارامییە.


هاوسەرۆكی كەجەكە لە كۆتاییدا دەڵێت : هێرشەكە بە ڕازیبوونی ڕوسیا كرایە سەر عەفرین، ئەمریكاش ڕایگەیاند، كە ئەوان بەرگری لەو ناوچەیە ناكەن، وتیان ئێمە لەو ناوچەیە ئۆپەراسیۆن ناكەین، ئەوەش بەو واتایە دێت، كە ئێوە ئازادن هێرش بكەن، دەوڵەتانی ئەوروپاییش دووڕوویی دەكەن، دەیانەوێت ناكۆكییەكانیان لە سەر گەلی كورد چارەسەربكەن، ، سیاسەتەكانی ئەوروپا، ئەمریكا و ڕوسیا هیچ خزمەتێك بە ئازادی و دیموكراسی ناكەن، ئەوان كورد دەكەنە قوربانی و دەیانەوێت لەو ڕێگایەوە ئامانجەكانی خۆیان بپێكن.