سەرۆكی فەڕەنسا و توركیا بە تەلفون تاوتوێی دۆخی عەفرین دەكەن

یەک شەممە, 04 شوبات 2018 09:20

 


سەرۆكایەتی كۆماری توركیا بڵاویكردەوە، شەوی ڕابردوو هەردوو ئیمانوێل ماكرۆن سەرۆكی فەڕەنسا و ڕەجەب تەیب ئەردۆگان سەرۆكی توركیا پێكەوە بە تەلەفون چەند پرسێكیان تاوتوێكردووە كە سەرەكی ترینیان پرسی هێرشەكانی سوپای توركیا و سوپای سوریای ئازادە بۆ سەر هەرێمی عەفرین.


بەگوێرەی بەیاننامەی سەرۆكایەتی توركیا، شەوی ڕابردوو لە پەیوەندیەكی تەلەفۆنیدا ماكرۆن و ئەردۆگان تاوتۆی پەیوەندیەكانی هەردوو وڵات و پرسە جیهانیەكانیان كردووە بەتایبەت پرسی كۆنگرەی گفتوگۆی سوری لە سوتچی و پرۆسەی چڵە زەیتون كە تیایدا هێرشی سوپای تروكیا بۆ سەر عەفرین ئەنجام دەدرێت.


ئاماژە بەوەكراوە هەردوولا لەسەر ئەوە ڕێكەوتوون كە لە پەیوەندی بەردەوامدا دەبن بۆ چارەسەركردنی پرسە هەنوكەییەكان.


ئەردۆغان بە ماكرۆنی ڕاگەیاندووە توركیا چاوی نەبڕیووەتە خاكی هیچ وڵاتیك و ئامانج لە ئۆپەراسیۆنی چڵە زەیتونیش پاككردنەوەی عەفرینە لە گروپە چەكدارەكان كە لە رێگەی ئاراستەكردنی مووشەكەوە هێرشیان كردۆتە سەر هەردوو پارێزگای هاتای و كلیس.