لە هێرشەكەی ئەمریكا بۆسەر سوریا دەیان سەربازی رووسیا كوژراون

سێ شەممە, 13 شوبات 2018 17:29

 

 

هەفتەی رابردوو فڕۆكە جەنگییەكانی سوپای ئەمریكا بۆردومانی پەلامارێكی ڕژێمەكەی ئەسەدیدا بۆسەر هێزە كوردییەكان و لەئەنجامیشدا بەدەیان سەرباز كوژران، ئێستاش دەركەوتووە كە بەشێك لە كوژراوەكان رووسین.

بەپێی هەواڵێكی ئاژانسی بلۆمبێرگ، لە هێرشی هەفتەی ڕابردووی ئەمریكا بۆ سەر بنكەكانی سوپای سوریا لە دێرزور، دەیان سەربازی ڕووسی كوژراون.

ئەو سەرچاوەیە لە هەواڵێكیدا باسی لەوەكردووە، زیاتر لە (200) هاوڵاتی ئەو وڵاتە كە لە ڕیزی سوپای سوریادا شەڕیان كردووە، لە هێرشی ئەمریكا بۆ سەر ئەو هێزانە لە ناوچەی دێرزوردا كوژراون، ئەو ژمارە كوژراوە بە پێی هەواڵی ئەو ئاژانسە زۆرترین ژمارەی كوژراوانی ڕووسیایە لە پاش شەڕی سارد.

لە بەرامبەردا بەرپرسانی سەربازی ڕووسیا ڕایانگەیاندووە، پەیوەندیان بەو هێرشەوە نەبووەو سوپای ئەمریكاش ئەو بابەتەی پشت ڕاست نەكردۆتەوە.

ئەوە لە كاتێكدایە كە (جەیمز ماتیس) وەزیری بەرگری ئەمریكا بەبێ ڕوونكردنەوەی زیاتر لەو بارەیە، ڕووداوی لەو چەشنەی بە سەر لێ شێوێنەر وەسف كردووە.

لە درێژەی ڕاپۆرتی بلۆمبێرگدا هاتووە: بەرپرسانی ئەمریكی وتوویانە كە بەر لە هێرشەكەو هاوكات و تەنانەت پاش هێرشەكانیش بۆ سەر بنكەكانی سوپای سوریا لەگەڵ هاوتایانی ڕووسی خۆیان لە پەیوەندیدا بوونە.

 

ئـ . كـ