فەڕەنسا: پێویستە بەرنامە موشەكییەكەی ئێران بخرێتە ژێر چاودێری نێودەوڵەتییەوە

پێنج شەممە, 15 شوبات 2018 06:32

 

سەرۆكی فەڕەنسا ڕایدەگەیەنێت: پێویستە بەرنامە موشەكییە باڵیستییكیەكەی ئێران بخرێتە ژێر چاودێریی نێودەوڵەتیەوەو هەموو جۆرەكانی چارەسەرێكی سەربازیی بۆ ئەو ڕەوشە هەڵەیە.

 


ئیمانوێل ماكرۆن سەرۆكی فەڕەنسا بەڕۆژنامەنوسانی وڵاتەكەی ڕاگەیاند: فەڕەنسا یەكێكە لەو لایەنەنای كە ڕێكەوتنەكەی لەگەڵ ئێراندا واژۆ كردووە، دەیەوێت ڕێكەوتنەكە بپارێزێت چونكە هیچ جێگرەوەیەكی باشتر نیە بۆ ئەو ڕێكەوتنە.

 


هەروەها ووتیشی: پێویستە باس لەو موشەكانە بكرێت كە پەیوەندییان بە ئێرانەوە هەیە و لە یەمەن و سوریا بەكاردەهێنرێن چونكە هەڕەشەیە بۆ سەر ئاسایشی هاوپەیمانەكانی فەڕەنسا.

 


سەرۆكی فەڕەنسا ئەوەشی خستەڕوو: خولێكی نوێی دانوستانەكانم دەیەوێت لەگەڵ لایەنە ناوخۆییەكان و وڵاتانی ئەندامی هەمیشەیی لە ئەنجومەنی ئاسایشی نێودەوڵەتیدا وەكو چۆن لەپێناو ڕێكەوتنە ناوەكییەكەدا كردمان، بەڵام ئەمجارە دەبێت فراوانتر بێت تاوەكو وڵاتانی ناوچەكەش بەشدار بن و بتوانین هەڕەشەكانی سەر ناوچەكە كەم بكەینەوە و بەسەریاندا زاڵ بین و دەشمانەوێت بەرنامە موشەكییەكەی ئێران بخەینە ژێر چاودێرییەوە، ئەمەش دەبێت بكرێت لەپێناو ئاسایشی ناوچەكەدا، بۆیە ئێمە پێویستمان بە فشار و چاودێریكردن هەیە بۆ ئەم مەبەستە.

 


هەروەها ووتیشی: ئێمە دەبێت لەگەڵ ڕژێمی ئێرانیدا گفتوگۆ بكەین و باوەڕم وایە هەموو جۆرەكانی چارەسەری سەربازیی بۆ ئەو ڕەوشە هەڵەیە.

 


جێگای ئاماژەبۆكردنە لەمیانەی ئەو مەترسییانەی كە ڕووبەڕووی ڕێكەوتنە ناوەكییەكەی ئێران بوونەتەوە، بەریتانیا و فەڕەنسا و ئەڵمانیا كار دەكەن تا كۆتایی مانگی پێنج پلانێك دابنێن بۆ مامەڵەكردن لەگەڵ هەردوو بابەتی تاقیكردنەوە موشەكیەكانی ئێران و چالاكیی و دەسەڵاتەكانی لە ناوچەكەدا تاوەكو سەرۆك ترامپ ڕازی بكەن.

 

 

 

 

س ب