توركیا رێگری له‌ چوونی سوپای سوریا ده‌كات بۆ عه‌فرین

چوار شەممە, 21 شوبات 2018 11:03

 

سه‌باره‌ت به‌ چوونی سوپای سوریا بۆ عه‌فرین، وتەبێژی سەرۆکایەتی کۆماری تورکیا رایگەیاند: به‌ هه‌موو شێوه‌یه‌ك رێگری له‌ چوونی هێزی سوریا بۆ عه‌فرین ده‌كه‌ین و له‌ دوێنێشه‌وه‌ چه‌ندین كاروانی سوپای سوریامان كردۆته‌ ئامانج.

ئه‌مڕۆ 21ی شوباتی 2018، لە کۆنگرەیەکی رۆژنامەوانیدا ئیبراهیم کاڵن وتەبێژی سەرۆکایەتی کۆماری تورکیا رایگەیاند: هێزە حکومییەکانی سوپای سوریا هەوڵیاندا بچنە نێو سنوری عەفرینەوە، بەڵام بەهۆی ئەوەی لەلایەن تۆپهاوێژەکانمانەوە بۆردومانکران، ناچار بە پاشەکشە کران بەرەو ئیدلەب، ئەگەر جارێکی دیكه‌ ئەو هەوڵە بدەن ئەوا هەمان کاریان بەسەردا دەهێنین.

ئیبراهیم کاڵن ئاشكرایكرد، له‌ دوێنێوه‌ تۆپهاوێژەکانی تورکیا ٤٠ بۆ ٥٠ ئۆتۆمبیلی سەربازی سوپای سوریاییان کردۆته‌ ئامانج، کاتێک بەڕێگاوە بوون بۆ عەفرین بەو هۆیەوە ناچار بە پاشەکشەمان کرون.

وتەبێژی سەرۆکایەتی کۆماری تورکیا وتیشی: تاوه‌كو ئێستا ٦ خاڵمان داناوه‌ بۆ چاودێریکردنی ناوچەکانی شەڕ و بەنیازین ١٢ شوێنی تریش بەمەبەستی چاودێری کردنی دۆخەکە دیاری بکەین.

سه‌باره‌ت به‌ دانوستان له‌گه‌ڵ حكومه‌تی سوریا، کاڵن ئاماژەی بۆ ئەوەکرد، حکومەتی تورکیا هیچ دانوستانێکی فەرمی لەگەڵ سوریادا نییە، بەڵكو تەنها بەڕێگای ناڕاستەوخۆ ئاماژەکان دەداتە سوریا.

 

 

ش.م