توركیا هەڕەشەی سەربازی لە وڵاتێكی ئەوروپی دەكات

شەممە, 24 شوبات 2018 05:26

 

 

بەرپرسانی قوبرس دەڵێن، ژمارەیەك كەشتی جەنگی توركیا هەڕەشەی بەكارهێنانی هێزیان كردووە لە دژی كەشتی كۆمپانیایەكی ئیتاڵی، ئەگەر بێت و هەوڵی گەڕان بە دوای گازی سروشتی بدات لە نزیك كەنارەكانی قوبرس.

(ڤیكتۆراس پاپادۆپـۆلۆس) جێگری وتەبێژی حكومەتی قوبرس رایگەیاند، كەشتی هەڵكۆڵینی كۆمپانیای (Eni) ی ئیتاڵی هەوڵی دابوو بۆ گەڕان بە دوای گازی سروشتیدا لە ناوچەی (بلۆك 3) كە دەكەوێتە ئاوەكانی باشوری وڵاتەوە نزیك بكەوێتەوە، بەڵام (5) كەشتی جەنگی توركیا ڕێگەیان لێگرتووەو هەڕەشەیان لێكردووە ئەگەربێت و پاشەكشە نەكات ئەوا هێزی لە دژ بەكاردەهێنن.

توركیا لە (2/9) كەشتی جەنگی بۆ ئاوەكانی باشوری دورگەی قوبرس ڕەوانەكردووە، ئەمەش بە مەبەستی ڕێگەگرتن لە هەوڵەكانی قوبرس بۆ دەرهێنانی گازی سروشتی.

كاربەدەسـتانی توركیا دەڵێن، ئەگەربێت قوبرسی یۆنانی ئەو گازە دەربهێنێت ئەوا بەشە توركیـیەكەی دورگەی قوبرس بێبەش دەبێت لەو سامانە سروشتیـیە.

(نیكۆس ئاناستاسیادس) سەرۆكی قوبرس وتی: وڵاتەكەی سەرەڕای هەڕەشەكانی توركیا بەردەوام دەبێت لە گەڕان بە دوای گازی سروشتیدا.

لەلایەكی دیكە (جۆرج لاكۆترێـپـس) وەزیری وزەی قوبرس بە كەناڵی تەلەفزیۆنی سیگمای وتوە: هەتا ئێستا هەوڵەكانی یەكێتی ئەوروپا بۆ چارەسەركردنی كێشەكە شكستیان هێناوە.

جێگەی ئاماژەیە دورگەی قوبرس لە پاش شاڵاوە لەشكریـیەكەی توركیا لە ساڵی (1974)، بووە بە دوو بەشەوە، بەشێكی یۆنانی كە لەلایەن نەتەوە یەكگرتووەكانەوە دانی‌پیادانراوەو بەشێكی توركی كە تەنیا لەلایەن توركیاوە وەك وڵات ناسێنراوە، لە نێوان هەردوو بەشەكەش ناوچەیەكی دابڕاو هەیە لە ژێر سەرپەرشتی نەتەوە یەكگرتووەكاندایە.

 

ئـ . كـ