ئەمریكا زنجیرەیەك سزای تووند بەسەر كۆریای باكووردا دەسەپێنێت

شەممە, 24 شوبات 2018 05:48

 

 

سەرۆكی ئەمریكا ڕایگەیاند، وڵاتەكەی قورسترین سزا بەسەر كۆریای باكوردا دەسەپێنێت، ئەمەش لە ڕێگەی بە ئامانجگرتنی ئەو كۆمپانیاو كەشتیانەی یارمەتی بـیۆنگیانگ دەدەن لەو فرتوفێڵانەی دەیكات بۆ دەربازبوون لە سزا نێودەوڵەتیـیەكان.

(دۆناڵد ترامپ) سەرۆكی ئەمریكا لە وتارێكیدا لە ویلایەتی مێریلاندی نزیك واشنتۆنی پایتەخت وتی : بەم سزایانە ئەوپەڕی فشاردەخرێتە سەر كۆریای باكور تاوەكو ناچاربكرێت دەستبەرداری بەرنامەكانی خۆپـڕچەككردن ببێت.

كاربەدەستان دەڵێن سزاكان بەسەر (27) كۆمپانیای بازرگانی و باركردن و (28) كەشتی و كەسێـك دەسەپـێنرێن، دەڵێن ئەمانە یارمەتی كۆریای باكوریان داوە لە بازرگانیكردن بە نەوت و خەڵوزی بەردین و سووتەمەنی دیكە.

پاش ڕاگەیاندنەكەی ترامپ شاندی دیپـلۆماتی ئەمریكا لە ئەنجوومەنی ئاسایشی نەتەوە یەكگرتووەكان یاداشتنامەیەكیدا بە كۆمیتەی سزاكان لە ئەنجوومەنی ئاسایش، ئەمەش تاوەكو ئەو (56) كۆمپانیاو كەشتیە بخەنە لیستی ڕەشەوە بەهۆی پـێشێلكردنی بڕیارەكانی تایبەت بە سزاكانی سەر كۆریای باكور.

(نیكی هەیلی) باڵیۆزی ئەمریكا بۆ نەتەوە یەكگرتووەكان لە بەیانـنامەیەكدا وتی : ئەم سزا قورسانەی ئەمریكا نیشانی دەدەن واشنتۆن واز لە بیۆنگیانگ ناهێنێت هەتا دەسـتبەرداری بەرنامەكانی خۆپـڕچەككردنی نەبێت.

سەباندنی ئەم سزایانە لەلایەن ئەنجوومەنی ئاسایشەوە پـێویستی بە ڕەزامەندی ئەنجوومەنەكە هەیە، لەوانە چین كە هاوپەیمانی كۆریای باكورە.

 

 

ئـ . كـ