پنتاگۆن وەڵامی توركیا دەداتەوە

یەک شەممە, 25 شوبات 2018 05:55

 

 

وتەبێژی وەزارەتی بەرگری ئەمریكا وەڵامی تۆمەتەكانی سەرۆكی توركیای دایەوە كە واشنتۆنی تۆمەتبار كردبوو بە كوشتنی هاوڵاتیانی مەدەنی.

بەپێی هەواڵێكی ماڵپەری ئەحوال، (ئادریان گالۆی) وتەبێژی وەزارەتی بەرگری ئەمریكا جارێكی دیكە نیگەرانی وڵاتەكەی لە هێرشی سەر عەفرین دەربڕی و وەڵامی تۆمەتەكانی ئەردوگانیشی دایەوە.

ئەردوگان پێشتر ئەمریكای تۆمەتبار كردبوو كە ئاماری درۆ لەسەر كوژرانی خەڵكی سڤیل و ئاوارە بوونیان لە عەفرین بە هۆی هێرشی توركیا بۆ سەر ئەم ناوچەیە بڵاو دەكاتەوە.

هەروەها ناوبراو بە تووندی ڕەخنەی لە ئەمریكا گرتبوو كە بۆچی توركیای بەو گرنگییە وەلا ناوەو پشتیوانی لە كوردانی سوریا دەكات.

لە وەڵامدا وتەبێژی پنتاگۆن وتی: ئێمە زۆر لە هێرشی سەر عەفرین نیگەرانین و سوپای توركیا دەبێت بۆ پاراستنی گیانی خەڵكی سڤیل ڕێكاری یاسایی و نێونەتەوەیی بگرێتە بەر.

هەروەها باسیشی لەوەكردووە، ئێمە داوا لە هەموو لایەنەكان دەكەین كە دان بە خۆیاندا بگرن و خۆیان لە شەڕو ناكۆكی زیاتر بپارێزن و گیانی خەڵكی نەخەنە مەترسییەوە.

شایانی باسە توركیا ماوەی زیاتر لە مانگێكە هێرش دەكاتە سەر كانتۆنی عەفرین، بەڵام نەیتوانیوە لەسەر سنوورەكانی خۆی زیاتر پێشڕەوی بكات.

 

 

ئـ . كـ