رۆژانە 5 كاتژمێر بۆردومانی غۆتە دەوەستێت

سێ شەممە, 27 شوبات 2018 05:41

 

 

دەزگای هەواڵی ئینتەرفاكسی رووسیا رایگەیاند، وەزارەتی بەرگری وڵاتەكەی ڕایگەیاندووە، لە ئەمڕۆ سێشەممەوە لەمیانەی ئاگربەستێكی ڕۆژانەییدا سوپای سوریا هێرشەكانی بۆ سەر غۆتەی ڕۆژهەڵات ڕادەگرێت كە لەژێر دەسەڵاتی چەكدارانی ئۆپۆزسیۆندایە بۆ ماوەی پێنج كاتژمێر. دەزگای هەواڵی رووسیا لە ژەنەڕاڵ (یوری یڤتۆشینكۆ) ی سەرۆكی ناوەندی چاودێری رووسیا لە سوریا بڵاویكردەوە، چەكدارانی ناوچەكە سەدان هاوڵاتیان بە دیل گرتووەو لەنێویشیاندا منداڵ و ئافرەت هەیە.

دەزگاكە راشیگەیاندووە، ژەنەراڵ (یوری) وتوویەتی : ناوەندەكە لەگەڵ حكومەتی سوریادا دەست دەكەن بە هێنانە دەرەوەی نەخۆش و بریندارەكانی ناوچەكە.

جێگەی ئاماژەیە لەماوەی ڕابردوودا سەرۆكی رووسیا (ڤلادیمێر پۆتین) فەرمانی بە ئاگربەستێكی ڕۆژانەیی كرد لە سوریادا بۆ ماوەی پێنج كاتژمێر تاوەكو هەلێك بڕەخسێت بۆ هێنانە دەرەوەی بریندارەكانی ناوچەی غۆتەی ڕۆژهەڵات.

 

ئـ . كـ