حیزبەكانی ڕۆژهەڵاتی كوردستان داوای پارێزگاری لە حكومەتی هەرێم دەكەن

پێنج شەممە, 08 ئازار 2018 08:41

 


بە بۆنەی تیرۆركردنی سەركردەیەكی سەربازی حیزبی دیموكراتی كوردستان، ناوەندەكانی هێزەكانی ڕۆژهەڵاتی كوردستان لە بەیاننامەیەكدا ئێران تۆمەتباردەكەن و بەرپرسیاریەتی ژیانیان دەخەنە ئەستۆی حكومەتی هەرێم .


لە بەیاننامەكەدا هاتووە" پێشتریش لەلایەن كۆماری ئیسلامییەوە چەند هەوڵی دیكەی تێرۆریستی دژ بە هێزە سیاسییەكانی ڕۆژهەڵاتی كوردستان دراون كە بەشێكیان وەك هەوڵە تێرۆریستییەكان بۆ سەر سازمانی خەباتی كوردستانی ئێران ، كۆمەڵەی زەحمەتكێشانی كوردستان و كۆمەڵەی شۆڕشگێڕی زەحمەتكێشانی كوردستانی ئێران پووچەڵ كرانەوە و تەقینەوەكەی شەوی یەڵدا لە بنكەی دەفتەری سیاسیی حیزبی دیموكراتی كوردستان كە بەداخەوە شەهید بوونی حەوت تێكۆشەری كوردی لێ كەوتەوە".


ئەمەی خوارەوە دەقی بەیاننامەكەیە:


بەیاننامەی ناوەندی هاوكاریی حیزبەكانی كوردستانی ئێران

كردەوە تێرۆریستییەكانی كۆماری ئیسلامی د بە هێزەكانی ڕۆژهەڵاتی كوردستان مەحكووم دەكەین

وەك لە ڕاگەیەندراوی خەبەریی سكرتاریای حیزبی دێموكراتی كوردستاندا هاتووە، شەوی سێشەمە لەسەر چوارشەمە ٦ لەسەر ٧ی مارسی ٢٠١٨، ١٥ لە سەر ١٦ی ڕەشەمەی ١٣٩٦ی هەتاوی قادر قادری، كادری حیزبی دێموكراتی كوردستان لە كردەوەیەكی تێرۆریستیدا شەهید بووە و تەرمەكەی له ‌دەوروبەری ماشێنەكەی لە نزیك گوندی "هەرتەلێ" لە كاتێكدا كە ئاسەواری زیاتر لە بیست فیشەكی پێوە بووە، دۆزراوەتەوە.

هەر چەند ڕۆژ پێش بوو لە نێو شاری هەولێر، دوو ئەندامی حیزبی دێموكراتی كوردستانی ئێران بوونە قوربانیی كردەوەیەكی تێرۆریستی كە یەك لەوان بەناوی" سەباح ڕەحمانی" دوای هەڵگرتنی برینی قورس بە داخەوە شەهید بوو.

پێشتریش لەلایەن كۆماری ئیسلامییەوە چەند هەوڵی دیكەی تێرۆریستی دژ بە هێزە سیاسییەكانی ڕۆژهەڵاتی كوردستان دراون كە بەشێكیان وەك هەوڵە تێرۆریستییەكان بۆ سەر سازمانی خەباتی كوردستانی ئێران ، كۆمەڵەی زەحمەتكێشانی كوردستان و كۆمەڵەی شۆڕشگێڕی زەحمەتكێشانی كوردستانی ئێران پووچەڵ كرانەوە و تەقینەوەكەی شەوی یەڵدا لە بنكەی دەفتەری سیاسیی حیزبی دیموكراتی كوردستان كە بەداخەوە شەهید بوونی حەوت تێكۆشەری كوردی لێ كەوتەوە.

ئێمە وەك حیزبەكانی ڕۆژهەڵاتی كوردستان، كۆماری ئیسلامی لە پشت هەموو ئەو تاوان و كردەوە تێرۆریستییانەوە‌ دەبینین، چونكە جیا لە ڕێژیمی كۆماری ئیسلامی هیچ لایەنێكی دیكە بە نەیار و دوژمنی خۆمان دانانێین.

بە تایبەت كە دەزگای تێرۆری كۆماری ئیسلامی پێشینە و ڕابردوویەكی پڕدیاری لە تێرۆری كادر و پێشمەرگە و ئەندامانی حیزبە كوردییەكانی ئۆپۆزیسیۆنی ڕێژیمدا هەیە، هەر لە تێرۆرەكانی دەیەی ٩٠ی زایینی دژ بەهێزە سیاسییەكانی ڕۆژهەڵاتی كوردستان كە سەدان تێكۆشەری كوردیان لێ ستاندین، هەم لە تێرۆری كەسایەتییە سیاسییەكانی دژبەری كۆماری ئیسلامی لە دەرەوەی وڵات، بە تایبەت تێكۆشەرانی كورد كە دواتر لە پەروەندەی تێرۆری مێكونۆسدا دەزگای قەزایی ئاڵمان لە بڕیارە مێژووییەكەی خۆیدا ڕایگەیاند كە كۆماری ئیسلامیی ئێران و كاربەدەستانی هەرە سەرووی ئەو ڕێژیمە لە پشتی ئەو تێرۆر و تاوان و جیناتانە‌ن كە ڕێژیم لە دەرەوەی وڵات كردوونی.

ئێمە حیزبە سیاسییەكانی كوردستانی ئێران چ بە تاك و چ بە كۆ (كۆبوونەوەی هاوبەشی حیزبە كوردستانییەكانی هەر چوار بەشی كوردستان بۆ مەحكوومكردنی كردەوەی تیرۆریستیی شەوی یەلدا) پێشتر و هەر ئەو كات ڕامانگەیاند كه ‌نیگەرانین لەوەی تاوانی تیرۆریستیی شەوی ١ی بەفرانبار‌ و پیلانە پووچەڵ بۆوەكانی پێشتر، سەرەتایەك بێ بۆ ئەوەی جارێكی دیكە هەرێمی كوردستان ببێتەوە بە مەیدانی پیلان و هەڕەشە و كردەوەی تیرۆریستیی لە دژی لایەنە سیاسییە خەباتكارەكانی ڕۆژهەڵاتی كوردستان و، ئێستا بەداخەوە دەردەكەوێ كە نیگەرانییەكانمان لە جێی خۆیدا بووە.

ئێمە جارێكی دیكەش وێڕای مەحكووم كردنەوەی كردەوە تێرۆریستییەكانی كۆماری ئیسلامی لە دژی تێكۆشەرانی ڕۆژهەڵاتی كوردستان، كه ‌نوێترینیان تێرۆری سەباح ڕەحمانی و قادر قادرییە؛ بە ئەركی حكوومەتی هەرێم و سەرجەم دەزگا پێوەندیدارەكانیشی دەزانین ڕێگر بن لە جێبەجێبوونی هەڕەشە و پیلانە تێرۆریستییەكان لە دژی لایەنە سیاسییەكانی ڕۆژهەڵاتی كوردستان كە لە هەرێمی كوردستان، گیرساونەوە. هەروەها بە ئیمان بە ڕەوابوونی خەباتی كورد لە ئێران بۆ دەستەبەری مافە مەدەنی و نەتەوایەتییەكانی، پێ لەسەر ئەوە دادەگرینەوە كە تێرۆر و هەڕەشە وتۆقاندن و سەركوت، هەنگاومان پێ شل ناكەن و لە خەبات و تێكۆشان ساردمان ناكەنەوە.

ناوەندی هاوكاریی حیزبەكانی كوردستانی ئێران

٧ی مارسی ٢٠١٨
١٦ی ڕەشەمەی ١٣٩٦

ناوەندی هاوكاریی حیزبەكانی كوردستانی ئێران پێكهاتووە له:

حیزبی دێموكراتی كوردستانی ئێران
حیزبی دێموكراتی كوردستان
كۆمەڵەی شۆڕشگێڕی زەحمەتكێشانی كوردستانی ئێران
كۆمەڵەی زەحمەتكێشانی كوردستان
سازمانی خەباتی كوردستانی ئێران