هێرش ده‌كرێته‌ سه‌ر سوپای پاسداران

دوو شەممە, 12 ئازار 2018 10:49

 

شه‌وی رابردوو، ژماره‌یه‌ك چه‌كداری نه‌ناسراو هێرش ده‌كه‌نه‌ سه‌ر بازگه‌یه‌كی سوپای پاسداران، له‌ به‌یاننامه‌یه‌كدا، سوپای پاسدارانی ئێران ئه‌و هه‌واڵه‌ی پشتڕاستكرده‌وه‌ و ژماره‌ی كوژرا و برینداره‌كانی ئاشكرا كرد.

لە ڕاگەیەندراوێکدا، پەیوەندییە گشتییەکانی قەرارگای قودسی سەر بە هێزی زەمینی سوپای پاسدارانی ئێران بڵاویکردەوە، شەوی ڕابردوو ئەندامانی گروپێکی تیرۆریستی و چەکدار بەنیازبوون بە ئۆتۆمبێلی بۆمبڕێژکراو هێرش بکەنە سەر یەکێک لە بازگەکانی سەر سنوور لە ناوچەی سەراوانی پارێزگای سیستان و بەلوچستان.


سوپای پاسداران ئاشكرایكردووه‌، به‌هۆی وریایی و بڕیاری خێرای هێزەکانمان، هێرشه‌كه‌ی ئه‌و گروپه‌ تیرۆریستیه‌ بێ ئاکام و مایه‌پوچ بووه‌ و لە ئەنجامی ئەو هێرشەدا دوو چەکداری ئەو گرووپە کوژراون و دوو ئەندامی سوپای پاسدارانیش بریندار بوون.


پەیوەندییە گشتییەکانی قەرارگای قودسی سوپای پاسداران ده‌ڵێت: یەکێک لە تیرۆریستەکان کە نەیتوانیوە لە بازگەکەمان نزیک بێتەوە، پشتێنە بۆمبڕێژکراوەکەی تەقاندۆتەوە و لەناو چووە.


جێگه‌ی باسه‌، سوپای پاسداران هیچ ئاماژەیەکی بە ژمارەی ئەندامانی ئەو گروپە نەکردووه‌ و تا ئێستاش هیچ گروپ و لایەنێک بەپرسیارێتی ئەو هێرشەی لە ئەستۆ نەگرتووە.

 

 

 

ش.م