ئێران هۆشداری بە كۆریای باكور دەدات

چوار شەممە, 13 حوزەیران 2018 05:30

 

 

ئێران هۆشیاریدایە ڕێبەری كۆریای باكوور (كیم جۆنگ ئون) سەبارەت بە متمانەكردنی بە سەرۆكی ئەمریكا (دۆناڵد ترامپ) و وتی: لەوانەیە لە ماوەی چەند كاتژمێرێكدا ڕێكەوتنەكەیان بۆ نەهێشتنی چەكی ناوەكی هەڵبوەشێنێتەوە.

ترامپ و كیم لەمیانەی كۆبوونەوەكەیاندا لە سەنگافورە بەڵێنیاندا كار بكەن لەپێناو نەهێشتنی چەكی ناوەكی لە نیمچە دوورگەی كۆریادا لەكاتێكدا واشنتۆن بەڵێنیدا گرەنتی ئاسایش بدات بە دوژمنە كۆنەكەی.

دەزگای هەواڵی ئێرنا لە زاری (موحەمەد باقر نۆبخەتی) وتەبێژی حكومەتی ئێرانەوە بڵاویكردەوە، نازانین چ جۆرە كەسانێك ڕێبەری كۆریای باكوور دانوستانیان لەگەڵدا دەكات، پێش ئەوەی بگاتەوە وڵاتەكەی خۆی لەوانەیە ڕێكەوتنەكە هەڵبوەشێنێتەوە.

نۆبخەت گومانی لە ڕاستی ترامپ كردو وتی، ئەم كەسە نوێنەرایەتی گەلی ئەمریكا ناكات، وە بەدڵنیاییەوە لە هەڵبژاردنەكانی داهاتوودا خۆیانی لێ بەدوور دەگرن.

جێگەی ئاماژەیە وەكو چۆن لە ڕێكەوتنە ناوەكییەكەی ئێران كشایەوە، (دۆناڵد ترامپ) بەیاننامە هاوبەشەكەی ڕابەرانی كۆمەڵەی حەوتی پیشەسازی ڕەت كردەوەو پشتیوانی لێنەكرد.

وتەبێژی وەزارەتی دەرەوەی ئێران ئامۆژگاری سەركردایەتی كۆریای باكووری كردو پێی وتن : تەواو ئاگاداری خۆیان بن لە دانوستانەكاندا لەگەڵ ئەمریكا.

بەهرام قاسمی وتی، هەست بە گەشبینی ناكەین سەبارەت بە گفتوگۆكان، ئەمریكاو بەتایبەتی ترامپ، ڕێكەوتنە نێودەوڵەتییەكانی لەناوبردووەو تاكلایەنانە كشاوەتەوە لێیان.

 

 

ئـ . كـ