زاوای ترامپ لەگەڵ بن سەلـمان كۆدەبێتەوە

پێنج شەممە, 21 حوزەیران 2018 05:38

 

 

ڕاوێژكاری كۆشكی سپی و زاوای سەرۆكی ئەمریكا (جارێد كوشنەر) سەبارەت بە ئیسرائیل و خاكی فەڵەستین لەگەڵ شازادەی جێگرەوەی سعودییە كۆبوونەوە، ئەمەش لەكاتێكدایە كوشنەر پلانێكی ئاشتی ئەمریكی بۆ ڕۆژهەڵاتی ناوەڕاست ئامادە دەكات.

كۆشكی سپی لە بەیاننامەیەكدا ڕایگەیاندووە، كوشنەرو موحەمەد بن سەلـمان بە هاوەڵی نوێنەری ئەمریكا بۆ ئاشتی لە ڕۆژهەڵاتی ناوەڕاست (جەیسن گرینبلاتدا) گفتوگۆیان لەسەر بەهێزكردنی پەیوەندییەكانی نێوان ئەمریكاو سعودییە كردووەو هەروەها گفتوگۆیان لەسەر ناردنی یارمەتی مرۆیی كردووە بۆ غەززە.

جێگەی ئاماژەیە كوشنەر ڕۆژی سێشەممە لەگەڵ مەلیك عەبدولڵای ئەردەنیدا كۆبوونەوەیەكی هاوشێوەی ئەنجامداوە.

دوای ئەوەی ئەمریكا بڕیاریدا بە گواستنەوەی باڵیۆزخانەكەی لە ئیسرائیلەوە بۆ ئۆرشەلیم، هاوڵاتیانی فەڵەستینی بە توندی ناڕەزاییان دەربڕی و دەیان كەس كوژران، ئەمەش گومانی خستە ئەوەی كە بتوانرێت ئاشتی لە ڕۆژهەڵاتی ناوەڕاستدا بەدەست بهێنرێت.

چەند رۆژ لەمەوبەریش سەرۆكی ئەمریكاداوای لە هەریەكە لە وڵاتانی (سعودییەو ئیمارات و بەحرێن) كردبوو خۆیان ئامادە بكەن بۆ خەرج كردنی بڕی زیاتر لە یەك ملیار دۆلار لەنێو خاكی غەززە.

 

 

ئـ . كـ