كۆریای باكوور لە ئەمریكا نیگەرانە

هەینی, 10 ئاب 2018 05:21

 

 

كۆریای باكوور، ئەمریكای تۆمەتبار كرد بە تۆمەتی هەوڵدان بۆ سەپاندنی سزانی نێودەوڵەتی بەسەر بیۆنگ یانگدا سەرەڕای ئەوەی كۆریای باكوور لەلای خۆیەوە نیازپاكی پێشانداوە.

وتەبێژی وەزارەتی دەرەوەی كۆریای باكوور لە بەیاننامەیەكدا ڕایگەیاندووە، بیۆنگ یانگ هێشتا ئارەزووی جێبەجێكردنی ئەو ڕێكەوتنە دەكات كە (دۆناڵد ترامپ) و ڕابەری كۆریای باكوور (كیم جۆنگ ئون) لە كۆبوونەوەكەی سەنگاپوورەدا پێی گەیشتن.

ئەمریكاو كۆریای باكوور ڕێكەوتن لەسەر ئەوەی چەكی ناوەكی كۆریای باكوور نەهێڵن، بەڵام لەو كاتەوە هەردوولا ڕووبەڕووی قورسایی بوونەتەوە بۆ گەیشتن بە ڕێكەوتنێك بۆ جێبەجێكردنی ئەو ئامانجە، لەكاتێكدا ئەمریكا سوورە لەسەر بەردەوامبوونی سزاكان.

ئەم لێدوانەی كۆریای باكوور دوای ئەوە هات بەرپرسانی ئەمریكی وتیان، پێویستە لەسەر كۆریای باكوور هەنگاوی زیاتر بنێت بەرەو نەهێشتنی چەكی ناوەكی.

وەزارەتی دەرەوەی كۆریای باكوور وتیشی، بیۆنگ یانگ تاقیكردنەوە موشەكی و ناوەكییەكانی ڕاگرتووە دوای ئەوەش شوێنی تاقیكردنەوە ناوەكییەكانی لابردووەو لەگەڵ ئەوانەشدا ئەمریكا هێشتا سوورە لەسەر ئەوەی سەرەتا دەبێت چەكی ناوەكی نەهێڵدرێت.

وەزارەتەكە وتیشی، كۆریای باكوور سەرەڕای ئەوەش لاشەی ئەو سەربازە ئەمریكییانەی ڕەوانەی ئەمریكا كردەوە كە لە جەنگی كۆریادا لە ماوەكانی نێوان (1950 – 1953) دا كوژراون.

كۆریای باكوور كۆمەڵێك بەرپرسی باڵای ئەمریكی تۆمەتبار كرد كە ئاماژەی بە ناوەكانیان نەداو وتی : بە حەزی ترامپ كار ناكەن.

نوێنەری ئەمریكا لە نەتەوە یەكگرتووەكان (نیكی هەیڵی) وتی: ئەمریكا حەز ناكات زۆر چاوەڕێی كۆریای باكوور بكات تاوەكو ڕێوشوێن دەگرێتە بەر بە ئاڕاستەی نەهێشتنی چەكی ناوەكی، هەیڵی بە ڕۆژنامەنووسانی وت : تۆپەكە لە یاریگای كۆریای باكووردایە.

هەروەها لە ماوەی ڕابردوودا ڕاوێژكاری ئاسایشی نیشتیمانی ئەمریكا (جۆن بۆڵتۆن) وتی : كۆریای باكوور هێشتا ڕێوشوێنی پێویستی نەگرتۆتە بەر بە ئاڕاستەی نەهێشتنی چەكی ناوەكی.

هەروەها لەم هەفتەیەدا وەزیری دەرەوەی كۆریای باكوور سەردانی ئێرانی كردو سەرۆكی ئێران (حەسەن ڕۆحانی) پێی ڕاگەیاند كە ئەمریكا جێگەی متمانە نیە.

 

 

ئـ . كـ