سعودییە : ناكۆكیمان لەگەڵ كەنەدا كاریگەری لەسەر نەوت نابێت

هەینی, 10 ئاب 2018 05:51

 

 

وەزیری وزەی سعودییە رایگەیاند، پێدانی نەوتی سعودییە بە كەنەدا كاریگەری لەسەر نابێت بەهۆی ناكۆكییەكانی نێوان دوو وڵاتەكەوە سەبارەت بە مافەكانی مرۆڤ، ئەمەش دوای ئەوەی سعودییە مامەڵە بازرگانی و وەبەرهێنانە نوێیەكانی لەگەڵ كەنەدادا ڕاگرت.

دوای ئەوەی كەنەدا داوای لە سعودییە كرد هەموو ئەو چاڵاكەوانە دەستگیركراوانەی كۆمەڵگەی مەدەنی ئازاد بكات، سعودییە لە وەڵامدا هەموو پەیوەندییەكانی لەگەڵ كەنەدادا بڕی و باڵیۆزی كەنەدای لە وڵاتەكە دەركردو هاوردەی گەنم و جۆی كەنەدی قەدەغە كردو هەموو پڕۆگرامەكانی خوێندن و چارەسەری حكومی لە كەنەدا ڕاگرت.

سەرۆك وەزیری كەنەدا (جەستن ترودۆ) وتی : بەردەوام دەبێت لە فشار خستنە سەر سعودییە سەبارەت بە ئازادی هاوڵاتیانی مەدەنی، بەڵام هەوڵیش دەدات ئەو گرژییەی نێوانیان كەم بكاتەوە بە وتنی ئەوەی كە سعودییە تۆزێك پێشكەوتووە لە بواری مافەكانی مرۆڤدا.

لە چاوپێكەوتنێكی تەلەفزیۆنیدا باڵیۆزی سعودییە لە كەنەدا وتی : لێدوانەكانی ترودۆ ئەرێنین، بەڵام دەبێت هەوڵی زیاتر بدرێت.

وەزیری وزەی سعودییە (خالید فالح) لە بەیاننامەیەكدا وتی، سیاسەتی نەوتی حكومەتی سعودییە ئەوەیە كە پێدانی نەوتەكەی بە هەر وڵاتێكی جیهان نەخاتە مەترسییەوە بەمەبەستی هۆكاری سیاسی.

جەختیشی لەوە كردەوە ئەم سیاسەتە جێگیرەو لەژێر هیچ بارودۆخێكی سیاسییدا كاریگەری لەسەر نابێت.

فالح وتیشی، ئەو گرژییەی ئێستا هەیە لە پەیوەندییەكانی نێوان سعودییەو كەنەدادا بە هیچ شێوەیەك كاریگەری لەسەر كۆمپانیای ئارامكۆی سعودیدا نابێت لەگەڵ بریكارەكانیدا لە كەنەدا.

 

 

ئـ . كـ