لەسەر S 300 ، ئەمریكا داوایەكی بەپەلە لە رووسیا دەكات

سێ شەممە, 25 ئەیلول 2018 05:51

 

 

ڕاوێژكاری ئاسایشی نیشتیمانی ئەمریكا رایگەیاند، پلانەكانی ڕووسیا بۆ پێدانی سیستەمی موشەكی ئێس - 300 بە سوریا دەبێتە هۆی مەترسییەكی گەورە بۆ ناوچەكەو مۆسكۆ دروستی دەكات، هیوای خواست حكومەتی ڕووسیا چاو بخشێنێتەوە بە بابەتەكەدا.

ڕووسیا ڕایگەیاند، سیستەمی مووشەكی زەوی بۆ ئاسمان دەدات بە سوریا، ئەمەش سەرەڕای ناڕەزایی ئیسرائیل كە هەفتەیەك لەمەوپێش ڕووسیا تۆمەتباری كرد بەوەی بەشێوەیەكی ناڕاستەوخۆ هۆكار بووە لە خستنە خوارەوەی فڕۆكە ڕووسییەكەدا لە سوریا.

(جۆن بۆڵتۆن) بە ڕۆژنامەنووسانی وتووە، پێمان وایە بە پێدانی سیستەمی مووشەكی ئێس - 300 بە سوریا، مۆسكۆ مەترسییەكانی ناوچەكە زیاتر دەكات، ئەگەر ئەم هەواڵانە ڕاست بن ئەوا هیوادارین ڕووسەكان چاو بخشێننەوە بە بابەتەكەدا.

وتیشی، نابێت ئەوە بكرێت، لایەنی بەرپرسیار لە هێرشەكانی ناو سوریاو لوبنان كە بەرپرسی سەرەكیش بوو لە خستنە خوارەوەی فڕۆكە ڕووسییەكەدا، ئێرانە.

بۆڵتۆن لەگەڵ ئەوەشدا هۆشیاریدایە حكومەتی سوریا لەسەر بەكار‌هێنانی چەكی كیمیایی و وتی ئەگەر هاتوو چەكی كیمیایی بەكار بهێنن ئەوا وەڵامدانەوەی ئەمریكا زۆر بەهێز دەبێت.

بۆڵتۆن وتی: ئەگەر دووبارە هەڵەی ئەوە بكەن جارێكی دیكە چەكی كیمیایی بەكاربهێنن ئەوا وەڵامدانەوەی ئەمریكا لە جاری پێشووتر بەهێزتر دەبێت.

بۆڵتۆن وتی : ئەمریكا ئەوەی لە توانایدا بێت دەیكات تاوەكو گرەنتی ئەوە وەربگرێت كە سوریا چەكی كیمیایی بەكارنەهێنێت و وتیشی : لە هەمان كاتدا فشاریشمان خستۆتە سەر ڕووسیا لەسەر ئەو بابەتە.

بۆڵتۆن ئاماژەی بەوەدا پێویستییەك هەیە بۆ دۆزینەوەی چارەسەرێكی سیاسی، بەڵام وتیشی پلانەكانی رووسیا سەبارەت بە سیستەمە موشەكییەكە دۆزینەوەی ئەو چارەسەرە زۆر قورس دەكات، وتیشی : هەتاوەكو ئێران لە سوریادا بمێنێتەوە، هێزەكانی ئەمریكاش لەوێ دەمێننەوە.

بۆڵتۆن وتی : هەتاوەكو هێزەكانی ئێران لە دەرەوەی سنووری ئێران بن بە بریكارەكانیان و میلیشیاكانیشیانەوە، ئەوا ئێمە ناڕۆین.

 

 

 

ئـ . كـ