سیناتۆرێكی ئەمریكی : شازادەی سعودییە شێتە

چوار شەممە, 05 کانونی یەکەم 2018 06:05

 

 

ئەندامانی باڵای ئەنجوومەنی سیناتی ئەمریكا وتیان، لە هەموو كات زیاتر دڵنیان لەوەی شازادەی جێنشینی سعودییە (موحەمەد بن سەلـمان) تێوەگلاوە لە كوشتنی ڕۆژنامەنووسی سعودی (جەمال خاشقچی) یدا، ئەمەش دوای ئەوەی لە كۆبوونەوەیەكی داخراودا گوێبیستی هەڵسەنگاندنەكانی بەڕێوبەری دەزگای هەواڵگری ناوەندی ئەمریكا (جینا هاسپێڵ) بوون سەبارەت بە بابەتەكە.

ڕابەری دیموكراتەكان لە لێژنەی پەیوەندییەكانی دەرەوەی سەر بە ئەنجوومەنی سینات (بۆب مێنیندێز) وتی، دڵنیابوومەوە لەوە، هەروەها داواشی كرد ئەمریكا كاردانەوەیەكی بەهێزی هەبێت لەسەر كوشتنی خاشقچی و پشتیوانی خۆی دەربڕی لە پڕۆژە یاسایەك كە هەموو پشتیوانیەكانی ئەمریكا بۆ هاوپەیمانێتی عەرەبی بە ڕابەرایەتی سعودییە لە جەنگی یەمەن كۆتایی پێ دەهێنێت.

دوای ئەوەی بەڕێوەبەری دەزگای هەواڵگری ناوەندی ئەمریكا (جینا هاسپێڵ) لە دانیشتنێكی داخراودا لەبەردەم لێژنەی پەیوەندییەكانی دەرەوەی ئەنجوومەنی سیناتدا لێدوانیدا، مێنیندیز ئەم لێدوانانەی بۆ ڕۆژنامەنووساندا.

كاتێكیش پرسیار لە سەرۆكی لێژنەی پەیوەندییەكانی دەرەوەی ئەنجوومەنی سینات (بۆب كۆركەر) كرا سەبارەت بەوەی كە ئایا لێدوانەكانی (جینا هاسپێڵ) ڕای كەسی گۆڕیوە، لە وەڵامدا سەری لەقاند وەكو ئاماژەیەك بۆ ئەوەی كە پێشتر دڵنیابوون لەوەی شازادەی جێگرەوەی سعودییە دەستی هەبووە لە كوشتنی خاشقچیدا.

سیناتۆر (لینزی گراهام) بە ڕۆژنامەنووسانی وت، ئەمە پلانی بۆ داڕێژراوەو لەلایەن چەند كەسێكەوە بە سەرپەرشتی (موحەمەد بن سەلـمان) ڕێكخراوە، ئەگەر پێت وانەبێت ئەوا خۆت لە ڕاستیەكە دەشاریتەوە.

ئەو راشیگەیاندووە، شازادەی سعودییە كەسێكی سەرشێتەو داهاتووی پەیوەندییەكانی نێوان ریازو واشنتۆنیش دەخاتە مەترسییەوە.

 

 

ئـ . كـ