ئێران هەڕەشەیەكی نوێ‌ لە ئەمریكا دەكات

چوار شەممە, 05 کانونی یەکەم 2018 06:24

 

 

سەرۆكی ئێران رایگەیاند، ئەگەر ئەمریكا بیەوێت بەر بە هەناردەكردنی نەوتی ئێران بگرێت، هیچ نەوتێك لەناچەكانی كەنداوەوە هەناردە ناكرێت.

(حەسەن ڕۆحانی) سەرۆكی ئێران لە میانەی سەردانێكی پارێزگای سمنان وتی: لە ئێستادا دوای (40) ساڵ فشاری ئەمریكا، ئێمە سەركەوتنی زۆر باشمان بەدەستهێناوە، هێزی ئێران بۆ ئەمریكاو ئیسرائیل جێگەی قبوڵ كردن نییە، بەڵام خەڵكی ئێمە چۆك دانادات.

ئەو وتیشی، ئەمریكا ڕایگەیاندووە كە هەناردەكردنی نەوتی ئێران بە سفر دەگەیەنێت، بەڵام نەیانتوانیوە ئەم كارە بكەن، ویستیان ئێران لە ناوچەكە گۆشەگیر بكەن نەیان توانی، ئەمریكا با باش بزانێت كە ئێمە نەوتی خۆمان هەر دەفرۆشین و ئەوان ناتوانن بەر بە فرۆشی نەوتی ئێران بگرن، با ئەمەش بە باشی بزانن ئەگەر ڕۆژێك بەر هەناردە كردنی نەوتی ئێران بگرن، هیچ نەوتێك لەناوچەكانی كەنداوەوە هەناردە ناكرێت.

سەرۆك كۆماری ئێران ئاماژەی بەوەدا: ئەوان دەیانەوێت ئێران لە بازرگانی كردن لەگەڵ دراوسێیەكان و چین و ڕووسیاو ئەوروپا داببڕن، بەڵام تێیدا سەركەتوو نەبوون، دەیانەوێت بە پاگەندەو تۆمەت جیهان لە ئێران بتۆقێنن كە تاكوو ئێستە سوودی نەبووەو شكستیان خواردووە، تەنیا دوو وڵاتی بچووك و ئیسرائیل هاوڕێی سیاسەتەكانی ئەمریكایان كردووە.

ئەو ئاماژەی بە هێزەكانی ئێران كردو جەختی كردەوە: كە هێزەكانی ئێران و ڕێبەری باڵا تەنیا بۆ ئێران ئەمنیەتیان نەهاوردووە، بەڵكوو ئەمنیەتیان بۆ عێراق، سوریا، لوبنان و خەڵكانی ناوچەكە دابین كردووە، ئێران هەوڵ دەدات تاكوو خەڵكی ستەملێكراوی یەمەن لە بەرانبەر داگیركارانی سعودییە سەركەون، دڵنیام خەڵكی یەمەن سەردەكەون و ئالی سعوود شكست دێنێت.

ڕۆحانی وتیشی: لە ئێستا دەوڵەت و مەجلیس و ڕێكخراوی دادو لە سەرووی هەموویانەوە ڕێبەری و خەڵكی ئێران لە هەرچی كاتە سەركەوتوو ترن، ئێمە ڕێگە نادەین دوژمنان ئێران شكست بدەن، سەرەڕای هەموو دوژمنكارییەكان ئێمە تاكوو (10) ڕۆژی دیكە پلانی بودجەی ساڵی داهاتوو ڕادەستی ئەنجوومەنی شورای ئیسلامی دەكەین.

ئەو زیادی كرد: لە بودجەی ئەمساڵ مووچەی هەموو فەرمانبەران و خانەنشینەكان سەرەڕای هەموو گەماڕۆكان (20%) زیاد دەكەین، پشكێكی باشیش بۆ هەلی كارو كشتوكاڵی لە بەرچاو گیراوە، هیچ جۆرە هەڵاوسان و بێكارییەك هەڕەشە لە سەر ئێران ناكات، چونكە هەموو ڕێكارە پێویستەكان لە بەرچاو گیراوە.

سەرۆك كۆماری ئێران لە كۆتاییدا وتی: لەم چەند ساڵەدا نرخی گەنمان لە (600) تمەنەوە كردووە بە (1600) تومەن و ئەمەش بەرهەمی گەنمی بەرز كردۆتەوەو یارمەتی باشی ئابووری جووتیارانی داوە، لە ئێستادا بە دڵنیاییەوە دەڵێم كە هیچ گوندێكی زیاتر لە (20) ماڵ لە ئێران بوونی نییە كە ئاوو كارەباو گازی ناو ماڵ و ئینتەرنێتیان بۆ نەكێشرابێت و هەموو ئەمانەش لە سەردەمی دەسەڵاتی كۆماری ئیسلامی ئێراندا كراوەو لە هەموو وڵاتانی ناوچەكە زیاترین خزمەتگوزاریمان بۆ خەڵك كردووە.

 

 

ئـ . كـ