ئەنجێلا مێركڵ واز لەسەركردایەتی پارتەكەی دێنێت

شەممە, 08 کانونی یەکەم 2018 05:26

 

 

ڕاوێژكاری ئەڵمانیا لە پاش (18) ساڵ كۆتایی بە ڕێبەرایەتی خۆی بۆ پارتی یەكێتی دیموكراسی كرستیانی وڵاتەكەی هێنا.

(ئەنجێلا مێركڵ) كە لە ساڵی (2000) ەوە ڕێبەرایەتی ئەو پارتەی كردووە، لە كۆنگرەی گشتی پارتەكەی لە شاری هامبۆرگ و بە ئامادەبوونی (1001) بەرپـرسی پارتەكەی كە یەك لەسەر سێـیان ژنن، وتارێكی بەم بۆنەوەیەوە پـێشكەشكردو سوپاسی ئەندامانی پارتەكەی كرد كە بە درێژایی ئەو چەندان ساڵە هاوكاری بوون.

لە ئێستادا لە كۆی (14) كاندید (3) كاندید ماونەتەوە بۆ گرتنە دەستی ئەم پـۆستە كە براوەكەی بەرەو پـۆستی ڕاوێژكاری وڵاتەكە دەبات، واتە سەرۆكی حكومەت، دەبات.

(یەنس شپان) تەمەن (38) ساڵ كە وەزیری تەندروستیشە، یەكێكە لە كاندیدەكانە، بەڵام وەك دەڵێن هەلی سەركەوتنی كەمە، بۆیە زیاتر ڕكابەریـیە سەرەكیـیەكە دەكەوێتە نێوان دوو كاندیدەكەی دیكە كە بریتین لە خانم (ئانێگرێت كرامپ كارینبەوەر) تەمەن (56) ساڵ سكرتێری گشتی پارتەكەو (فریدریش میرتس) تەمەن (63) ساڵ، پارێزەرو ئەندامی پـێشووی پەرلەمانی یەكێتی ئەوروپا.

ئەمە یەكەم جارە لە پاش نزیكەی (47) ساڵ سێ كاندید هەبن بۆ ڕێبەرایەتی پارتی یەكێتی دیموكراسی كرستیانی ئەڵمانیا.

ئاژانسی دەنگ‌وباسی فڕانس پـرێس دەڵێت، بەپـێی ڕاوەرگرتنە گشتیـیەكان ڕكابەریـیەكەی نێوان ئەم دوو كاندیدە زۆر توند دەبێت، بەو پـێـیەی بەرپـرسانی بەشداربووی كۆنگرەكە كە بە نوێنەر ناودێر دەكرێن لە نێوان خۆیاندا زۆر دابەشبوون سەبارەت بە ڕێبازی داهاتووی پارتەكەیان لە پاش ڕۆیشتنی مێركڵ.

جێگەی ئاماژەیە بەشێك لە لایەنگرانی ئەم پارتە تووشی نائومێدی بوون بەهۆی سیاسەتەكانی مێركڵ، بە تایبەتی لە مەسەلەی واڵاكردنی سنوورەكانی ئەڵمانیا لە بەردەم كۆچبەرانی نایاسایی سوریی و عێراقی لە هەردوو ساڵی (2015 و 2016)، بۆیە پـێشبینی دەكرێت ئەم پارتە دەسەڵاتدارە گۆڕانكاری لە سیاسەتەكانی خۆیدا بكات.

 

 

ئـ . كـ