ئەم وڵاتە ئامادەیی بۆ میوانداری كردنی ترامپ و ئۆن دەربڕی

19/01/2019 - 09:22 بڵاوکراوەتەوە لە هەواڵ/گشتی

 

 

سەرۆك وەزیری ڤێتنام رایگەیاند، وڵاتەكەی ئامادەیە میوانداری سەرۆكی ئەمریكاو ڕێبەری كۆریای باكور بكات، لەم كاتەی باس لە ئەگەری ئەنجامدانی كۆبوونەوەی دووەمی نێوان ئەو دوو ڕێبەرە دەكرێت بە ئامانجی نەهێشتنی چەكی ناوكی لە نیمچە دورگەی كۆریا.

(نگوێن شوان فوك) سەرۆك وەزیری ڤێتنام لە چاوپـێكەوتنێكیدا لەگەڵ كەناڵی بلومبێرگ وتی، ئامادەن پـێشوازی لە (دۆناڵد ترامپ) و (كیم جۆنگ ئون) بكەن.

وتیشی، هێشتا بڕیاری كۆتایی نەدراوە، بەڵام ئەگەر بڕیار درا كۆبوونەوەكە لە ڤێتنام بەڕێوەبچێت ئەوا هانۆی هەرچ كارئاسانیـیەك لە توانایدابێت دەیكات بۆ ئەنجامدانی كۆبوونەوەكە.
پـێشتر سەرچاوەیەك لە حكومەتی ڤێتنام بە ئاژانسی دەنگ ‌و باسی فرانس پـرێسی وتبوو، ئامادەكاری لۆجستی دەكرێت بۆ ئەنجامدانی كۆبوونەوە چاوەڕوانكراوەكەی نێوان سەرۆكی ئەمریكاو ڕێبەری كۆریای باكور لە وڵاتەكەیان، بەڵام وتیشی : هێشتا بە فەرمی هیچ بڕیارێك نەدراوە.

چاودێران دەڵێن، ڕەنگە كۆبوونەوەكە لە هانۆی پایتەخت یان لە شاری دانانگی ناوەندی وڵاتەكە بەڕێوەبچێت.

شاری دانانگ لە ئێستادا شوێنێكی گەشتیاریـیەو لە سەردەمی شەڕی ڤێتنام بنكەیەكی ئاسمانی لێبوو كە لەلایەن هێزەكانی ئەمریكاو هێزەكانی ڤێتنامی باشور بەكاردەهێنرا.
ڤێتنام یەكێكە لە وڵاتەكانی باشوری ڕۆژهەڵاتی ئاسیا كە پەیوەندی دیبلۆماسیان لەگەڵ ئەمریكاو كۆریای باكور هەیە.

لە ئێستادا ئەمریكا پەیوەندیـیەكی باشی لەگەڵ ڤێتنامدا هەیەو هەردوو وڵات پەرەیانداوە بە پەیوەندیـیە ئابوری و بازرگانیـیەكانی نێوانیان.

 

 

ئـ . كـ