ئیسرائیل هێرش دەكاتە سەر سوریا

28/03/2019 - 08:45 بڵاوکراوەتەوە لە هەواڵ/گشتی

 

 

كەناڵی تەلەفزیۆنی سوریا ئاماژەی بەوەدا سوپا بەرپەرچی كۆمەڵێك موشەكیان داوەتەوە كە فڕۆكە جەنگییەكانی ئیسرائیل هاویشتوویانە لەمیانەی هێرشە ئاسمانییەكانیاندا بۆ سەر ناوچەیەكی پیشەسازی لە باكووری شاری حەلەب، ئاماژەشی بەوەدا زیانەكان ماددین.

لە بەیاننامەكەی سوپای سوریادا هاتووە دەڵێت، بەرگری ئاسمانی بەرپەرچی دوژمنكارییە ئاسمانییەكانی ئیسرائیلی داوەتەوە كە هەندێك شوێنی ناوچەی پیشەسازی شێخ نەجاریان لە باكووری ڕۆژهەڵاتی حەلەب كردۆتە ئامانج و ژمارەیەك موشەكیان خستۆتە خوارەوەو تەنها زیانی ماددی لێكەوتۆتەوە.

شارەزایانی سەربازی دەڵێن، حەلەب یەكێكە لەو ناوچە سەرەكییانەی كە هێزێكی سەربازی بەهێزی لێیە لەپاڵ سوپای پاسدارانی ئێراندا.

جێگەی ئاماژەیە چەند جارێك ئیسرائیل هێرشی ئاسمانی كردۆتە سەر ئامانجە ئێرانییەكان لە سوریاداو ئەو چەكدارانەش كە ئێران پشتیوانیان لێدەكات لە وڵاتەكەدا بە حزبولڵای لوبنانیشەوە.

سەرۆك وەزیری ئیسرائیل (بنیامین نەتنیاهۆ) وتی: لەمیانەی چەند ساڵی ڕابردوودا ئیسرائیل سەدان هێرشی ئاسمانی كردۆتە سەر سوریا بەمەبەستی سنووردانان بۆ دەسەڵاتەكانی ئێران و حزبولڵای لوبنانی.

لەگەڵ نزیكبوونەوەی هەڵبژاردنەكانی ئیسرائیلدا، حكومەت هێرشەكانی لە سوریا زیاد كردووەو هەروەها هەڵوێستێكی توندتریشی گرتۆتەبەر بەرامبەر حزبولڵا لەسەر سنووری لوبنان.