ئیسرائیل بەچڕی بۆردومانی غەززە دەكات

05/05/2019 - 08:19 بڵاوکراوەتەوە لە هەواڵ/گشتی

 

 

جارێكی تر لە كەرتی غەززەی فەڵەستینی گرژی دروست بوویەوەو سوپای ئیسرائیل بە فڕۆكەی جەنگی هێرشی ئاسمانی بۆسەر غەززە ئەنجامدا.

سوپای ئیسرائیل لەمبارەیەوە راگەیەندراوێكی بڵاوكردەوە كە تێیدا هاتووە، هێرشی ئاسمانیان بۆ سەر ئامانجەكانی حەماس و جیهادی ئیسلامی لە غەززە دەستپێكردووە. 

لە راگەیەندراوەكەدا ئاماژە بەوە كراوە كە بەهۆی ئاراستەكردنی نزیكەی (90) مووشەك لە كەرتی غەززە بۆ سەر ئیسرائیل، ئەم هێرشە دەستیپێكردووە.

هەر لە راگەیەندراوەكەدا ئەوەش خراوەتەڕوو، كە هاویشتنی مووشەك لە ناوچەكانی نزیك سنووری غەززە بۆ بەری ئیسرائیل تا ئێستاش بەردەوامە. 

لەلایەكی دیكەش بەپێی ئەو هەواڵانەی لە راگەیاندنەكانی ناوخۆیی ئیسرائیل بڵاوبۆتەوە، ژمارەی ئەو مووشەكانەی لە غەززەوە ئاڕاستەی ئیسرائیل كراون (100) دانەی تێپەڕاندووەو ژمارەیەكی زۆری ئەو مووشەكانەش لەلایەن سیستەمی بەرگری ئاسمانی ئیسرائیلەوە تەقێنراونەتەوە. 

راشگەیەندراوە، كە یەكێك لەو مووشەكانە كەوتۆتە نێو خانوویەكی شارەدێی ئەشكۆلی نزیك سنووری غەززەو لەئەنجامیشدا كەسێك كوژراوەو دوو هاوڵاتی فەڵەستینیش گیانیان لەدەستداوە.