هەر جوڵەیەكی ئێران لەدژی ئەمریكا بەتووندی وەڵام دەدرێتەوە

09/05/2019 - 08:42 بڵاوکراوەتەوە لە هەواڵ/گشتی

 

 

نوێنەری تایبەتی ئەمریكا بۆ ئێران رایگەیاند، هەر هێرشێكی ئێران بۆ سەر ئەمریكا یاخود هاوپەیمانەكانی، بە توندی وەڵام دەدرێتەوە.

(برایان هوك) بە ڕۆژنامەنووسانی وت، ئەمریكا جەنگی لەگەڵ ئێران ناوێت، بەڵام بەردەوام دەبێت لە توندترین فشارەكانی بۆ سەر ئەو وڵاتە تاوەكو ئەو وڵاتە هەڵسوكەوتەكانی دەگۆڕێت.

هەروەها ئاماژەشی بەوە كرد، سیاسەتی دەرەوەی ئێران دەكرێت بگۆڕدرێت، بەڵام هیچ وردەكارییەكی دیكەی لەسەر ئەوە نەدا، وتیشی : هەنگاوی ئێران بۆ كەمكردنەوەی بەرپرسیارێتییەكانی لە ڕێكەوتنە ناوەكییەكەی ساڵی (2015) دا پێشێلكردنی یاسا نێودەوڵەتییەكانە.

جێگەی ئاماژەیە ئێران ڕایگەیاند، هەندێك لە بەرپرسیارێتیەكانی لە ڕێكەوتنە ناوەكییەكەدا كەم دەكاتەوەو هەڕەشەی ئەوەی كرد ئەگەر وڵاتانی بەشدار لە ڕێكەوتنە ناوەكییەكە هەردوو كەرتی نەوت و بەنكی ئێران لە سزاكانی ئەمریكا نەپارێزن ئەوا ڕێژەی پیتاندنی یۆرانیۆم بەرز دەكاتەوە.