ئەمریكا ، توركیا لە پرۆگرامی (f 35) دەردەكات

09/06/2019 - 09:05 بڵاوکراوەتەوە لە هەواڵ/گشتی

 

 

ئەمریكا هەڵوێستەكانی توندكرد بەرانبەر توركیا لەسەر ڕێككەوتنی ئەنقەرە بۆ بەدەستهێنانی سیستەمی بەرگری موشەكی ڕووسی، پلانێكی خستەڕوو بۆ دەركردنی ئەو وڵاتەی هاوپەیمانی ناتۆ لە بەرنامەی فڕۆكەی جەنگی (F-35) كە بریتیە لە ڕاگرتنی ڕاهێنانی نوێ بۆ فڕۆكەوانە توركەكان لەسەر فڕۆكەی پێشكەوتوو.

وەزیری بەرگری ئەمریكا بە وەكالەت (پاتریك شانەهان) نامەیەكی بۆ هاوشانە توركەكەی ناردووەو تێیدا هەنگاوەكانی بۆ دەركردنی توركیا لەو پرۆگرامە خستۆتە ڕوو.

ئاژانسی ڕۆیتەرز ڕاپۆرتێكی بڵاوكردەوە كە تێیدا باس لەوە دەكات بڕیار دراوە وەرگرتنی فڕۆكەوانی زیاتری توركیا بۆ ڕاهێنان لەئەمریكا ڕابگیرێت، ئەمەش بەهۆی یەكێك لەو خاڵانەی كە واشنتۆن و ئەنقەرە ناكۆكن لەسەری.

ئەمریكا دەڵێت، بەدەستهێنانی سیستەمی بەرگری موشەكی ڕووسی (S-400) لەلایەن توركیاوە دەبێتە هەڕەشە بۆ سەر فڕۆكەی (F-35) كە توركیا بە نیازە ئەوەش بكڕێت، ئەمریكاش دەڵێت : توركیا ناتوانێت هەردووكی هەبێت.

شانەهان لە نامەكەیدا ڕوونی دەكاتەوە، هیچ ڕاهێنانێكی نوێ بە فڕۆكەوانە توركەكان ناكرێت.

بڕیار بوو لە كۆتایی ئەمساڵ (34) قوتابی ڕاهێنانەكانیان لە ئەمریكا ئەنجام بدەن، بەڵام شانەهان دەڵێت: ئەم ڕاهێنانە ناكرێت، چونكە ئێمە توركیا لە پرۆگرامی (F-35) دەردەكەین، چی تر پێویست ناكات ڕاهێنان لەسەر ئەو سیستەمان بكەن.

سەرۆكی توركیا (ڕەجەب تەیب ئەردوگان) ڕایگەیاندبوو، بە هیچ شێوەیەك توركیا پاشەگەز نابێتەوە لە سەوداكەی لەگەڵ مۆسكۆ، ئەردوگان وتی : ئەمریكا پێشنازەكەی بە ئەندازەی (S-400) بۆ ئێمە باش نەبووە.

ئەمریكا دەڵێت : (S-400) سیستەمێكی ڕووسیاییە كە بۆ لێدانی فڕۆكەكانی وەكو (F-35) دروست كراوە.