ترامپ سزای نوێی بەسەر ئێران سەپاند

25/06/2019 - 08:35 بڵاوکراوەتەوە لە هەواڵ/گشتی

 

 

سەرۆكی ئەمریكا كۆمەڵێك سزای نوێی لە دژی كاربەدەستانی ئێران واژوكرد كە (عەلی خامەنێئی) ڕێبەری باڵای ئێرانیش دەگرێتەوە.

(دۆناڵد ترامپ) سەرۆكی ئەمریكا لە كۆشكی سپی و بە ئامادەبوونی (مایك پـێنس) جێگری سەرۆك و (ستیڤن مەنۆخن) وەزیر خەزێنە وتی، كۆمەڵێك سزا واژودەكات كە ڕێبەری باڵای ئێران و ئۆفیسەكەی دەكاتە ئامانج، ئەمەش وەك كاردانەوە بەرامبەر ئەو كارە دوژمنكارانەی لە ماوەی چەند هەفتەی ڕابردوو ئەنجامی داون، لەوانە خستنی فڕۆكە ئەمریكیـیەكە.

وتیشی : خامەنێئی بەرپـرسە لەسەر كێشەكانی ڕژێمی ئێران و ئۆفیسەكەشی سەرپەرشتی ڕژێمەكەو سوپای پاسداران دەكات.

ترامپ دەڵێت، بەم سزایانە خامەنێئی و ئۆفیسەكەیی و كەسە نزیكەكانی سەرچاوەی دارایـیان لێدەبڕێت، جەختی كردەوە فشارەكانی ئەمریكا بۆ سەر ئێران زیاترو بەردەوام دەبن هەتا ئەو كاتەی ڕژێمەكە واز لە كارە مەترسیدارەكانی دەهێنێت و دەستبەرداری هەوڵەكانی دەبێت بۆ بەدەستهێنانی چەكی ناوكی، پەرەپـێدانی موشەكی بالیستی، پـشتیوانیكردنی تیرۆرزم، وە وازدەهێنێت لە خۆشكردنی شەڕو ناكۆكیـیەكانی لە نێو وڵاتانداو جموجۆڵەكانی لە دژی ئەمریكاو هاوپەیمانەكانی.

لەلایەكی دیكە وەزارەتی خەزێنە ڕاگەیاندنێكی لەم بارەیەوە بڵاوكردەوەو تێیدا نووسیویەتی سزا سەپـێندراوەتە سەر هەشت فەرماندەی باڵای سوپای پاسداران، ئەوانیش بریتین لە:

عەلی ڕەزا تەنگسیری فەرماندەی هێزی دەریایی سوپای پاسداران.

ئەمیر عەلی حاجی زادە، فەرماندەی هێزی ئاسمانی سوپای پاسداران.

موحەمەد پاكپور، فەرماندەی هێزی زەمینی سوپای پاسداران.

عەباس غولامشاهی، فەرماندەی ناوچەی یەكی هێزی دەریایی سوپای پاسداران.

ڕەمەزان زیراهای، فەرماندەی ناوچەی دووی هێزی دەریایی سوپای پاسداران.

یەدولڵا بادن، فەرماندەی ناوچەی سێی هێزی دەریایی سوپای پاسداران.

مەنسور ڕەوانكار، فەرماندەی ناوچەی چواری هێزی دەریایی سوپای پاسداران.

عەلی عوزمایی، فەرماندەی ناوچەی پـێنجی هێزی دەریایی سوپای پاسداران.