كێندەر توشی شێرپەنجەت دەكات

09/07/2016 - 14:44 بڵاوکراوەتەوە لە هەواڵ/تەندروستی

كوردیو -

رێكخراوێكی چاودێری بواری خۆراك لە وڵاتی ئەڵمانیا رایدەگەیەنێت كە چەند بەڵگەیەكی زانستی ئەوە نیشاندەدەن نەستەلەی كیندەر بڕێكی زۆر لە هەندێك مادەی شێرپەنجەی تێدایە.

 

بەپێی راپۆرتێكی ماڵپەڕی ئیندپێندت رایگەیاندووە چاودێرانی بواری تەندروستی خۆراكی سەر بەو دەزگا ئەڵمانییە داوا لە كۆمپانیای بەرهەمهێنی نەستەلەی كیندەر دەكەن بەرهەمەكانی لە بازاڕەكان بكشێنێتەوە، بەڵام بەرهەمهێنەرانی ئەو نەستەلەیە داواكەیان رەتكردووەتەوە.

 

رێكخراوی ئەوروپی بۆ سەلامەتی خۆراك ئاماژە بەوە دەكات كە ئەو مادەیەی لەناو نەستەلەكەدا دۆزراوەتەوە دەبێتەهۆی دروستكردنی شێرپەنجە و ناڕێكی لە جینەكانی مرۆڤدا و ئاماژە بەوە دەكات كە لە پێكهاتەی كیندەرداجۆرێكی مادە بە ناوی (Mineral Oil Aromatic Hydrocarbon)دۆزراوەتەوە.

 

تاوەكو ئێستا روون نەبووەتەوە كە لێكۆڵینەوەكانی ئەم دەزگا ئەڵمانیە تا چەند راستە، چونكە هەندێك رێكخراو و لایەنی تر ئاماژە بەوە دەكەن كە رێژەی ماددە كە هێندە زۆر نییە لە نەستەلەكەدا تا وەكو جێگەی نیگەرانی بێت.

 

هونەر بانەگوڵانی