نیشانەكانی هەوكردنی لەوزەتێن چییە ؟؟

28/07/2019 - 10:42 بڵاوکراوەتەوە لە هەواڵ/تەندروستی

 

 

لەوزەتێن : بریتییە لە دوو گرێ‌ لیمفاوی كە دەكەونە هەردوو لای قورگ و بەرگریكاری یەكەمن لە توشبوون بە بەكتریاو ڤایرۆس.

جۆرەكانی هەوكردنی لەوزەتێن:

1. هەوكردنی توندی لەوزەتێن، نیشانەكانی دەمێنێتەوە لەماوەی (3 – 4) رۆژ تاكو دوو هەفتە. 

2. هەوكردنی دووبارەی لەوزەتێن، نەخۆش لەماوەی ساڵێكدا چەندجارێك تووشی دەبێت. 

3. هەوكردنی بەردەوامی لەوزەتێن، نەخۆشەكە بەردەوام نیشانەكانی دەبێت وەكو هەوكردنی گەروو و لەوزەتێنەكان و ناخۆشی بۆنی دەم. 

نیشانەكانی هەوكردنی لەوزەتێن:

1. هەڵئاوسانی لەوزەتێن و دەركەوتنی پەڵەی سپی و زەرد لەسەر لەوزەتێنەكان.

2. ئاستەنگی لە قوتدانی خواردندا. 

3. بەرزبوونەوەی پلەی گەرمی لەش.

4. تەنگە نەفەسی.

5. گۆرانكاری لە دەنگدا بە هۆی هەوكردنی لەوزەتێنەكانەوە.

6. هەڵئاوسانی لیمفە گرێكان بە تایبەت لە ناوچەی مل و قوڕگ.

7. بۆنی دەم ناخۆش دەبێت.

ئەگەر لە منداڵدا روویداو نەیتوانی باس لە نیشانەكانی بكات ئەوا بەم نیشانانەدا دەناسریتەوە:

1. لیكی دێتە خوارەوە بەهۆی قوتدانی ناڕەحەت و بە ئازار.

2. رەتكردنەوەی خواردن. 

3. زوو بێتاقەت دەبێت.

چارەسەركردنی هەوكردنی لەوزەتێن:

1. چارەسەركردن لە ماڵەوە، كەسی توشبوو دەتوانێت خۆی چارەسەربكات لە ماڵەوە، ئەویش بە پشوودان و خواردنەوەی شلەمەنی و گەرمی زۆر، غەرغەرەكردن بە ئاوی گەرم و خوێ‌ و دووركەوتنەوە لە شوێنی تەپوتۆزو جگەرەكێشان. 

2. بەكارهێنانی ئەنتی بایۆتیك، ئەوەش لەكاتێكدا بەكاردێت كە هەوكردنەكە بەهۆی بەكتریاوە بێت و بەپێ‌ رێنمایی پزیشك دەبێت. 

3. نەشتەرگەری لابردنی لەوزەتێن، بۆ ئەو نەخۆشانە دەكرێت كە هەوكردنی زۆرو دووبارەیان هەیەو لەلایەن پزیشكی پسپۆرەوە بڕیاری لێ‌دەدرێت.