ژاوەژاو مەترسی لەسەر مرۆڤ هەیە، بەم شێوەیە

29/07/2019 - 09:40 بڵاوکراوەتەوە لە هەواڵ/تەندروستی

 

 

ژاوەژاو كە یەكێكە لە پیسكەرەكانی ژینگەو كاریگەری گەورەی نەرینی بۆ سەر كۆئەندامی دەمارو مێشك و دەروونی مرۆڤەوە هەیە، توێژینەوەیەكی نوێی ئەمریكی ئاماژە دەكات كە ژاوەژاوی ژینگەیی لەوانە دەنگی هاتوچۆی ئۆتۆمبێل لە شەقامەكان و فڕۆكە لە فڕۆكەخانەكان، دەبنە هۆی تووشبوونی مرۆڤ بە نۆرەی دڵ.

توێژینەوەكە كە لەلایەن كۆمەڵەی دڵی ئەمریكا، ئامادەكراوە، ئاماژەی كرد كە ئەو كەسانەی خانووەكانیان لە نزیكی ناوچەی ژاوەژاوە، زیاتر لە كەسانی تر ئەگەری تووشبوونیان لە نۆرەی دڵ و جەڵتەی مێشك هەیە. 

روونی كردەوە، ژاوەژاوی بەردەوام لە شەقام و فڕۆكەخانەكان و شوێنەكانی تر، دەبێتە هۆی چاڵاككردنی ناوچەی تایبەت بە رارایی لە مێشك و ئەوەش دەبێتە هۆی هەوكردنی لوولەكانی خوێن كە هۆكاری سەرەكییە بۆ روودانی نۆرەی دڵ. 

لای خۆیەوە دكتۆر (ئازار رادفار) لە نەخۆشخانەی ماساشوستس لە شاری بۆستنی ئەمریكی كە بەشداری لە ئامادەكردنی توێژینەوەكە كردووە، دەڵێت، بەڵگەی زیاتر هەیە بە بوونی پێوەندی لە نێوان ژاوەژاوی دەوروبەرو نەخۆشییەكانی دڵ و لوولەكانی خوێن، ئەگەرچی تا ئێستە بەڵگەكانی فیزیۆلۆجی لەبارەی ئەو پێوەندییە تا ئێستە روون نییە. 

وەك لە راپۆرتێكی بڵاوكراوەی خولی كۆلێژی نەخۆشییەكانی دڵ لە ئەمریكادا لەبارەی هۆكاری كاریگەری ژاوەژاو بۆ سەر دڵ هاتووە، ژاوەژاو دەبێتە هۆی كاریگەری ئەو پەستانەی لە كاردانەوەی كۆئەندامی دەمار لە رێگەی زیاد دەردانی هۆرمۆنی رارایی وەك كۆرتیزۆل بە تێپەڕبوونی كات دروست دەبێت، لەسەر لەش و بوونی بە هۆكاری زیانگەیاندن بە سیستەمی دڵ و لوولەكانی خوێن.