نەبوونی خۆراكی تەندروست، چ زیانێكی هەیە بۆ مرۆڤایەتی

30/07/2019 - 09:56 بڵاوکراوەتەوە لە هەواڵ/تەندروستی

 

 

ئەو هۆكارە زیانبەخشانەی كە ساڵانە دەبنە هۆی مردنی هەزاران كەس لە سەرتاسەری جیهاندا، نە جگەرە كێشان و نە بەرزی پەستانی خوێنە، بەڵكو نەبوونی ڕژێمێكی خۆراكی تەندروستە.

پرۆفیسۆرێكی تەندروستی پەیمانگای سەر بە زانكۆی واشنتۆن وتی: لە زۆربەی وڵاتانی جیهان ڕژێمە خۆراكیە نا تەندروستەكان مردنی زیاتریان لێ دەكەوێتەوە وەك لە هۆكارەكانی وەكو جگەرە كێشان و بەرزی پەستانی خوێن. 

لێكۆڵینەوە نوێیەكان دەریانخستووە، ئەوانەی دەمانكوژن ئەو خۆراكانەن كە نایانخۆین، چونكە كێشەكە تەنها لە هەڵبژاردنی خۆراكە ناتەندروستەكاندا نیە وەك گۆشتی سوورو خواردنەوە گازییەكان، بەڵكو وەرنەگرتنی خۆراكی تەندروستی پێویستە لەگەڵ زۆری ڕێژەی خوێ لە خواردنەكانماندا. 

لەكاتێكدا باسی ڕژێمە خۆراكیەكان دەكرێت هەمیشە مشتومڕو سەرنجەكان دەربارەی كەمكردنەوەی خۆراكی ناتەندروستە، بەڵام لەم لێكۆڵینەوەیەدا تیشك دەخەینە سەر ئەو ڕاستیەی كە كەمی ڕێژەی خۆراكی تەندروست لە لەشدا زیانی زیاتر بە تەندروستی دەگەیەنێت وەك لە زۆر خواردنی خۆراكی ناتەندروست.

لە جیهاندا لە كۆی پێنج حاڵەتی مردن یەكێكیان بەهۆی خواردنی زۆری ڕێژەی خوێ و كەمی بەروبوومە دانەوێڵەییەكان بە گشتی و كەمی میوەو سەوزەو چەرەزاتەوەیە كە لە ساڵی (2017) گەیشتۆتە (11) ملیۆن كەس، ئەم ڕێژەیەش زیاترە لەژمارەی ئەوانەی كە بەهۆی زۆر خواردنی خۆركی لەقتونراوو چەوریە زیانبەخشەكان و زۆر خواردنی شیرینیەوە گیان لە دەست دەدەن.

توێژینەوەكان ئەوەیان سەلـماندووە، ئەم پێوەرانە تایبەت نین تەنها بۆ كۆمەڵە كەسانێك بەڵكو بۆ هەموو كەسێكە گرنگ نیە لەهەر شوێنێكی دونیا بژی و بە شێوەیەكی گشتی ئەوەی لە تەواوی بابەتەكەدا تیشكی خراوەتەسەر ئەوەیە كە پێویستە لە خۆراكەكانی ڕۆژانەماندا ڕێژەی خواردنی خوێ كەم بكەینەوەو زیاتر گرنگی بدەین بە خواردنی میوەو بەروبوومە دانەوێڵەییەكان و شیرو هێلكەو سەوزەو چەرەزاتەكانی وەك و گوێزو بادەم و ... هتد.