هۆكارەكانی پڕخە پڕخ كردن بزانن ؟؟

21/08/2019 - 09:53 بڵاوکراوەتەوە لە هەواڵ/تەندروستی

 

 

بریتییە لەو دەنگە بێزاركەرەی كە لە مرۆڤ دەردەچێت لەكاتی نووستن بەهۆی داخرانی بەشی لە رێڕەوی هەناسەدان، هەندێك كاتیش رەنگە ئاماژەیەك بێت بۆ حاڵەتێكی مەترسیداری تەندروستی، جیا لەوەی مایەی بێزاری كەسانی دەوروبەرە لە هاوسەرو هاوڕێ و ئەوانەی لە شوێنی نزیكت دەخەون، رەنگە نیوەی كەسانی پێگەیشتوو ئەو حاڵەتەیان هەیەو هۆكارەكەی لەرینەوەی شانە نەرمەكانی قورگە لەكاتی راكێشان و پاڵنانی هەوایە بۆ هەناسەدان بەتایبەتی لەكاتی نووستن كە ئەو شانانە لە حەسانەوەو داكەتندان، بۆیە دەنگێكی بێزاركەر دەردەكەن. 

رەنگە گۆڕینی شێوازی ژیان یان دابەزاندنی كێش و دووركەوتنەوە لە خواردنەوەی كهول لە نزیك كاتی خەوتن یان خەوتن لەسەر لاتەنیشت یارمەتیدەر بن بۆ كەمكردنەوەی پرخەپرخ، جیا لەوانە چارەسەری پزیشكی بە دەرمان و نەشتەرگەری هەیە بۆ كەمكردنەوەی كاریكەری كێشەكە، بەڵام چارەسەری تەواوەتی نییە، بەشێك لە حاڵەتەكانی پرخەپرخ پەیوەستە بە تووشبوون بە شێوانی خەوتن یان وەستانی هەناسەدان لەكاتی نووستن، هەروەها كێشی زۆرو خواردنەوەی كهول و بوونی مەڵاشوێكی ئەستوورو نزم و بوونی كێشە لە لووت وەك خواری ئێسك و نەنووستن بۆ كاتی پێویست و شێوازی نووستن بەتایبەتی نووستن لەسەر پشت.

چارەسەری پرخەپرخ جیا لە چارەسەری پزیشكی بریتییە لە گۆڕینی هەندێك لە خوی رۆژانەو سیستەمی ژیان وەك نووستن لەسەر لاتەنیشت و هیتریش، بۆیە ئەگەر ئەوانە سوودیان نەبێت پێویستە سەردانی پزیشكی شارەزا بكرێت و ئەو بە دەرمان یان بە نەشتەرگەری بەپێی پێویست چارەسەری ئەو حاڵەتە دەكات.

ئێزگەیەكی ئەمریكا ئاماژەی كرد كە (40%) ی كەسانی پێگەیشتوو لەو وڵاتە بەدەست پرخەی شەوانە دەناڵێنن و پیاوان زیاتر لە ژنان حاڵەتەكەیان هەیە. 

ئیریك فۆیت پزیشكی لووت و قوڕگ و شارەزای نوستن لە زانكۆی نیویۆرك لە دیدارێكی ئێزگەی نیشتیمانی گشتی ئەمریكا (ئێن یس ئاڕ)، وتی: پرخەپرخ پێوەندی بە نووستنی باشەوە نییەو وەك بەڵگەیەكیش دەتوانرێت خەوێكی قووڵت هەبێت بێ هیچ دەنگێك.

زیاتر وتیشی، زۆرجار پرخەكردن زیانی نییە مەگەر بێزاركار نەبێت بۆ ئەو كەسەی لە نزیكتەوە خەوتووەو لە هەمان ژوور، بەڵام هەندێك كات دەكرێت ئاماژەیەك بێت بۆ حاڵەتێكی مەترسیدار كە یەكێك لەو هۆكارانەی دروستی دەكات زیادبوونی كێشی لەشە، بۆیە كاتێك كێشت دادەبەزێت پرخەپرخیشت كەم دەبێتەوە، هەروەها بوونی شێوان لە دیواری جیاكەرەوەی كونەكانی لووت.

ئەو پزیشكە ئاماژەیە كرد كە پرخەپرخی یەك ئاست و دەنگ جێگیر مەترسی نییە، بەڵام پرخەپرخ بە دەنگی بەرزو بوونی بەرز و نزمی لە دەنگەكەی رەنگە ئاماژەیەك بێت بۆ وەستانی هەناسەدان لەكاتی نووستن كە حاڵەتێكی مەترسیدارەو مەترسی تووشبوون بە نەخۆشییەكانی دڵ زیاتر دەكات.

هۆكارەكانی پرخەپرخكردن:

1. كێشی زیادی لەش و قەڵەوی. 

2. بوونی كێشە لە لووت یان هەستیاری و هەوكردنی لووت. 

3. نەنووستن بۆ ماوەیەكی گونجاو. 

4. نووستن بە شێوەیەكی هەڵە. 

5. وەستانی هەناسەدان لەكاتی نووستن. 

6. هۆكاری بۆماوەیی. 

7. هەوكردنی ئاڵووەكان. 

8. لە منداڵ بەهۆی هەوكردنی ئاڵووەكان و كۆئەندامی هەناسەدان روودەدات.

ئەژین عەبدولڵا – هەولێر