پێكەنین بەرگری لەش بەهێز دەكات

21/08/2019 - 12:06 بڵاوکراوەتەوە لە هەواڵ/تەندروستی

 

 

پێكەنینێك دەتوانێت ببێتە بەرانبەر بە وەرزشكردن بۆ ماوەی (10) خولەك لەسەر ئامێری راكردن لە رووی سوودەكانی بۆ لەش و سیستەمی بەرگری لەش و پاراستنی تەندروستی لەش و دوورخستنەوەی نەخۆشییە جیاجیاكان و درێژكردنی تەمەنی مرۆڤ لەو رێگەوە، ئەوەش بەپێی توێژینەوەیەكی زانكۆی ستانفۆردی ئەمریكی. 

لە توێژینەوەیەكی هاوشێوە لە زانكۆی شیكاگۆ لە ئەمریكا دەركەوتووە كە پێكەنین كەیفخۆشی دەتوانێت تەمەنی مرۆڤ هەشت ساڵ درێژتر بكات بە بەراورد بە هەستی خەمۆكی و رووگرژی، چونكە خۆشحاڵی و گەشبینی و پیكەنین دەبێتە هۆی چوونی بڕێكی زیاتری ئۆكسجین بۆ ناو لەش و ئەوەش یارمەتی دەدات بۆ نوێبوونەوەی خانە لەناوچووەكان و بەهێزكردنی سیستەمی بەرگری لەش و كەمكردنەوەی هەستكردن بە ئازارو كەمكردنەوەی راڕایی.

(عەبدولهادی مسباح) پزیشك و مامۆستای بەرگری لە كۆلێژی پزیشكی لە زانكۆی قاهیرە لەبارەی ئەنجامی توێژینەوەكان دەڵێت، پەیوەندییەكی راستەوخۆ لە نێوان مێشك و كۆئەندامی دەمارو سیستەمی بەرگری لەش هەیە، هەروەها پەیوەندی راستەوخۆ لە نێوان كۆئەندامی ناوەندی دەمارو دۆخی دەروونی مرۆڤەوە هەیەو هەر شتێك كار بكاتە سەر ئەوانە كاریش دەكاتە سەر سیستەمی بەرگری لەش و چەند جۆرە نەخۆشییەك دروست دەكەن.

وەك توێژینەوەكان ئاماژە دەكەن پێكەنین دەردانی ئەفیۆنات چاڵاك دەكات كە وەك پارێزەری میزاج و ئاكاری سروشت و ئاسایی مرۆڤ كار دەكەن، بۆیە لەگەڵ هەر پێكەنینێك لە دڵەوە (3.5) كالۆری دەسووتێت و بەوەش پێكەنین دەبێتە هۆكارێك بۆ شەنگبوونی لەش بە مەرجی نەخواردنی خۆراكی ناتەندروست، بۆیە زۆرینەی كۆمپانیاكانی جیهان پرۆگرامی خۆشی و پێكەنین دەخەنە بەردەستی كارمەندەكانیان لەكاتی حەسانەوەو رێست كە كار دەكاتە سەر توانای كاركردن و بەرهەمیان. 

هاوكات توێژینەوەیەكی نوێ ئاشكرای دەكات كە پێكەنینی رۆژانەی مرۆڤ بۆ ماوەی نیو سەعات، كار دەكاتە سەر جەستەو ئاماژەكانی كاركردنی ئەندامانی لەش باشتر دەكات و بەوەش تەمەنی مرۆڤ درێژتر دەبێت.

بەپێی ئەنجامی توێژینەوەیەك كە پزیشكان لە پەیمانگەی (ریزا) بۆ پزیشكی دەروونی جەستەیی كردوویانە، دەردەكەوێت كە پێكەنینی مرۆڤ بۆ ماوەی (30) خولەك كاریگەری ئەرێنی هەیە بۆ سەر تەندروستی لەش، بۆ نموونە پێكەنینی رێكوپێك یارمەتی باشتركردنی خەوتن دەدات و لە كاریگەری ماندووبوون دەتپارێزێت و كاری دڵ و جگەرو سییەكان رێك دەخات. 

پزیشكان ئاماژە دەكەن كە ئەو لەرینەوەی پێكەنین دروستی دەكات، هانی سووڕی خوێن و جووڵەی ئەندامانی ناوەوەی لەش دەدات و بەوەش لە خامۆشبوون دەیانپارێزێت، هەروەها پێكەنین زۆر گرنگە بەتایبەتی بۆ ئەوانەی گەیشتوونەتە تەمەنی (40) ساڵی، چونكە لەو تەمەنەدا دەبێتە هۆی باشتربوونی بەرگری لەش كە گرنگە بۆ پاراستن لە شێرپەنجە. 

توێژەران زیاتر دەڵێن، لەكاتی پێكەنیندا، لێدانی دڵ كەم دەبێتەوەو خوێنبەرەكانی فراوانتر دەبن و گیراوەی (ئینتەر فیرۆن – گاما)، چاڵاك دەبێت و دەردانی دژە تەنەكان (گڵۆبۆلینی بەرگری)، زیاتر دەبێت، جیا لە زیادبوونی گوێزەرەوە دەمارییەكان (هۆڕمۆنی خۆشحاڵی)، ئەوانەش هەموو یارمەتی مرۆڤ دەدەن بۆ رزگاربوون لە شڵەژانی دەروونی و ئاستی هۆڕمۆنەكانی رارایی كەم دەكەنەوە.

لە ئەنجامی هەموو ئەو كاریگەری و سوودانەی پێكەنین كە باس كران، دەردەكەوێت كاریگەری رۆژانەی پێكەنین لە ئەنجامەكەی دەبێتە هۆی درێژبوونی تەمەنی مرۆڤ.

ماكوان عیززە‌ت – هەولێر


بابەتی هاوشێوە