هۆكارەكانی سەوەفانی جومگە بزانن ؟؟

27/08/2019 - 10:22 بڵاوکراوەتەوە لە هەواڵ/تەندروستی

 

 

لە تووشبووانی سەوەفاندا، بەپێی قۆناغی نەخۆشییەكە، ئەو كڕكڕاگەیەی ڕووی ئێسكە بەرامبەرەكان لە جومگەكاندا دادەپۆشێت دادەخورێت و تەنك دەبێت و زبر دەبێت. 

ئێسكی زیادە لە دەوروبەری جومگەكەدا دروست دەبن و كێشەی زیاتر دەنێنەوە، بەستەرو ژێیەكان دادەخورێن، ماسولكەكان (زۆرجار بەهۆی كەم جووڵانەوە) لاواز دەبن و سەرەنجام ئێسكەكان فشاری زیاتریان دەچێتە سەر.

هۆی سەوەفان بە ووردی نەزانراوە، بەڵام ئەمانە ئەگەرەكە زیاد دەكەن:

1. بۆماوەیی. 

2. قەڵەوی. 

3. زەبرو شكانی پێشووتر لە جومگەكەدا. 

4. زیاد لەپێویست ماندوكردنی درێژخایەنی جومگەو كەنەفتكردنی. 

5. هەندێ‌ نەخۆشیی وەك (ئەو نەخۆشییانەی دەبنە هۆی خوێنبەربوونی ناو جومگە، وەك هیمۆفێلیا، هەوكردنی جومگەكان وەك لە دەردەشا (دائول ملوك) و ڕۆماتیزمی جومگە.

سەوەفان لە چلەكانی تەمەنەوە دەستپێدەكات و لە تەمەنی (70) ساڵیدا كەم كەس هەیە تووشی سەوەفان نەبێت.

نیشانەكانی:

زۆربەی تووشبووان هەست بە یەكێك یان زیاتر لە نیشانەكان دەكەن كە بریتین لە:

1. ئازاری جومگە: ئازارەكە بە وەرزش و جووڵان زیاد دەكات و بە پشوو كەمتر دەبێت. 

2. ئاوسانی جومگە. 

3. سنوورداریی جووڵەی جوگە. 

4. تێكچوونی شێوەی جومگە. 

چارەسەر:

ئامانجەكانی چارەسەر بریتین لە:

1. بەهێزكردنی جومگەكە لە رێگەی بەهێزكردنەوەی ئەو ماسولكانەی جووڵەكانی ئاراستە دەكەن. 

2. هێشتنەوەو باشتركردنی جووڵەی جومگەكە. 

3. نەهێشتنی ئازار.

دەرمان:

بۆ چارەسەری ئازارەكە پزیشك بە پاراسیتۆڵ دەست پێدەكات، چونكە زیانی كەمە. ئەگەر بەمە باش نەبووی یان ئاوساویی جومگەكەت هەبوو ناچار دەبێت چارەسەرییەكانی تری وەك دژە هەوكردنە ناستیرۆیییەكانی نموونەی پرۆفینت بداتێ‌، بەڵام ئەمانە زیانیان زیاترە وەك زیادكردنی ئەگەری تووشكردنت بە برینی گەدە، جەڵتەی دڵ و دەماخ، هەندێ‌ جاریش ماددەی ستیرۆیدی بە دەرزی دەكاتە ناو جومگەكە.

هەندێ‌ ماددەی درێژخایەنی تریش لەلایەن هەندێ‌ پزیشكەوە دەدرێن گوایە لینجی جومگەكە درووستدەكەنەوە، بەڵام لێكۆڵینەوە زانستییەكان نەیانسەلـماندووە بەسوود بن وەك گلوكۆزەماین و ئەوانیتر.

لە كۆتاییدا پزیشك بۆی هەیە جۆری دەرمانەكەت بۆ دیاری بكات، بە سەرنجدان لە دۆخی تەندروستی گشتی جەستەو ڕاددەی سەوەفانەكە، نابێ خۆبەخۆ بەكاریبهێنێ.

گۆڕینی ستایلی ژیان:

وەرزش باشترین یارمەتیدەرە بۆ تەندرووستی جومگەو بەهێزكردنی و لەناویاندا پیادەڕەوی و مەلەوانی پێشڕەون.

جگە لە وەرزش، ئەمانەش بەسودن:

1. دانانی كەرەستەی گەرم لەسەر جومگەكە یاریدەی كەمبوونەوەی ئازار دەدات. 

2. پشووی پێویست. 

3. دابەزاندنی كێش ئەگەر قەڵەوی. 

چارەسەری سروشتی:

بەشێكی چارەسەری فیزیاییەو بە ئامێری تایبەت دەكرێن، بەشێكی دیكەش ئەو وەرزشانەیە كە بۆ بەهێزكردنی جومگە تووشبووەكە فێر دەكرێیت و یاریدەی ئاسان جووڵانی جومگەكەش دەدات.

نەشتەرگەری: 

گۆڕینی جومگەكەو تەكنیكەكانی دیكە لە حاڵەتە هەرە قورسەكاندا دەكرێن كە تێیاندا سوودی پێویست لە دەرمان و وەرزش و رێگاچارەكانی دیكە نابینرێ.