زمان پێشبینی ئاشكرا كردنی نەخۆشییەكان دەكات

27/08/2019 - 11:26 بڵاوکراوەتەوە لە هەواڵ/تەندروستی

 

 

زانایان دەڵێن، زمان دەتوانێت پێشبینی ئەگەری تووشبون بە نەخۆشییە مەترسیدارەكان بكات.

تیمێكی توێژەرەوەی چینی لە زانكۆی (زینگیانگ) لەو بڕوایەدان بەرزبوونەوەی ئاستی هەندێك بەكتریای سەر زمان، ڕەنگە كلیلی ئاشكراكردنی شێرپەنجەی پەنكریاس بێت.

ئەمە لە كاتێكدایە ئێستا توێژینەوە لەمیكرۆبەكانی ڕیخۆڵە بۆتە بوارێكی نوێ و جێگەی مشتومڕ لە بواری لێكۆڵینەوە پزیشكییەكاندا، بەجۆرێك پسپۆڕان ئومێدەوارن ئەوە شێوازە نوێیە ببێتە هۆی چارەسەركردنی پێشوەختەی شێرپەنجە‌و نەخۆشییەكانی دیكەی ڕیخۆڵەو تەنانەت زەهایمەریش.

ئەنجامە نوێیەكانی لەگۆڤاری (زانستی زیندەوەرە مایكرۆسكۆبییەكانی ناودەم) دا بڵاوكراوەتەوەو تێیدا ئاماژە بەوە دراوە (مایكرۆبیۆم) ی زمان ڕەنگە یارمەتیدەر بێت بۆ ئاشكرا كردنی شێرپەنجەی پەنكریاس.

هەر لەو چوارچێوەیەدا تیمە پزیشكییە چینییەكە پشكنینیان بۆ كۆمەڵێك كەسی نەخۆشكرد، كە لە قۆناغی سەرەتایی نەخۆشی شێرپەنجەی پەنكریاسدا بوون كە ژمارەیان (30) كەس دەبوو و بەرواردیان كردن لەگەڵ (25) كەسی خۆبەخش كە تەندروستیان باش بوو هیچ نیشانەیەكی شێرپەنجەیان نەبوو، بۆ ئەمەش زنجیرەی بۆماوەیی زۆر پێشكەوتویان بەكارهێنا بۆ پشكنینی (میكرۆبیۆمەكانی زمان) و بۆیان دەركەوت ئەوانەی نەخۆشی شێرپەنجەی پەنكریاسیان هەیە جۆرە مایكرۆبێكی جیاواز لەسەر زمانیانە لە چاو ئەوانەی كە ساغن و هیچ كێشەیەكی تەندروستیان نییە.

یەكێك لەپسپۆڕانی بەشداربوو لەو تاقیكردنەوەیە ئاماژەی بەوە داوە هەرچەندە ئەنجامی توێژینەوەكە بەڵگەی جیاواز دەخەنەڕوو سەبارەت بە پەیوەندی مایكرۆبیۆمەكان و نەخۆشی شێرپەنجەی پەنكریاس، بەڵام هێشتا پێویستمان بە توێژینەوەی زیاترە بۆ ئەوەی بە تەواوی ئەوە بسەلـمێنین كە مایكرۆبیۆمەكانی سەر زمانی مرۆڤ دەتوانن ببنە زەنگی ئاگاداركردنەوە لە ئەگەری تووشبوونی كەسێك بە شێرپەنجەی پەنكریاس.

چوار جۆر بەكتریاش هەیە كە مەترسی تووشبوون بە شێرپەنجەی پەنكریاس زیاد دەكات، كەمبوونەوەی (Haemophilus) و (Porphyromonas)، هەروەها زیادبوونی ئاستی (Leptotrichia) و (Fusobacterium).

ئەو تیمە چینییە دەڵێن، ئەگەری زۆر بە هێز ئەوەیە كۆئەندامی بەرگری بەستەری گرنگ بێت لە نێوان مایكرۆبیۆمی زمان و شێرپەنجەی پەنكریاسدا، ئەگەر ئەوەش بسەلـمێت ئەوا ڕێگەیەكی باش دەبێت بۆ داهێنانی چارەسەری نوێ و لەوانەش دەرمانەكانی دژە زیندەییەكان و چارەسەرە بەرگرییەكان، بۆ یارمەتیدانی مرۆڤ تا لە ئایندەدا خۆی لە نەخۆشییە كوشندەكان بپارێزێت.

كەشتی نووح