هەنار كاریگەری لەسەر ئەم نەخۆشییە هەیە

31/08/2019 - 11:13 بڵاوکراوەتەوە لە هەواڵ/تەندروستی

 

 

چەند پسپۆڕێكی بەریتانی توێژینەوەیەكیان لەسەر سودەكانی هەنار ئەنجامداوەو بۆیان دەركەوتووە خواردنی ئەو میوەیە دەبێت هۆی چارەسەركردنی نەخۆشییەكانی زەهایمەرو پاركنسۆن.

بەپێی ئەنجامی توێژینەوەیەك كە چەند پسپۆڕێكی زانكۆی هادرسفیڵد لە بەریتانیا ئەنجامیانداوە، دەركەوتووە توێكڵی هەنار ماددەی بۆنكالاگین لە پێكهاتەكەیدایە كە دەبێتە هۆی ڕێگری كردن لە ئەگەری توشبوون بە نەخۆشی زەهایمەرو پاركنسۆن.

توێژەرەكان ئاماژە بەوە دەكەن كە ماددەی بۆنكالاگین دەبێتە هۆی ڕێگری كردن لە هەوكردنی ئەو خانانەی مێشك كە هۆكاری توشبونن بە زەهایمەرو پاركنسۆن.

سەبارەت بە چاكبوونەوەی ئەو كەسانەی ئەو دوو نەخۆشییەیان هەیە، سەرپەرشتیاری توێژینەوەكە ئاماژە بەوە دەكات كە هەنار نابێتە هۆی چاكبوونەوەی ئەو كەسانە، بەڵام نەخۆشییەكەیان لەئاستێكدا ڕادەگەڕێت و ڕێگری دەكات لەوەی تەندروستیان بەرەو خراپتر بچێت.