چارەی كرمی سكی منداڵان بزانن

01/09/2019 - 11:04 بڵاوکراوەتەوە لە هەواڵ/تەندروستی

 

 

سك ئێشەی منداڵ چەندان هۆكاری هەیە كە هەندێك جار بەهۆی بێتوانیان لە گوتنی راستی و نیشانەكانی ناتوانرێت بە جوانی دەستنیشان بكرێت و پێویست بە پشكنینی تاقیگەیی بكات، یەكێك لەو كێشانەی لە منداڵدا باوە كرمی سكە كە زۆرێك لەوان لە قۆناغێكی زووی تەمەنیان تووشی دەبنەوە بەهۆی چەند هۆكارێكەوە.

رەنگە منداڵ بەهۆی بەركەوتنی راستەوخۆی منداڵی ترەوە تووشی ببێت كە هەمان كێشەیان هەیە، لە خوارەوە باسی نیشانەو هۆكارو چارەسەری كراوە:

لە نیشانەكانی كرمی سك لە منداڵ، بوونی كێشەیە لە هەرسی گەدەو رەنگە منداڵ تووشی سكچوون یان قەبزی توند ببێتەوەو باو گازی ریخۆڵەی لەگەڵدابێت، بۆیە لە كاتی گەشتی دوورودرێژدا تێبینی تووشبوونی منداڵ بە سكچوون و ژەهراویبوون بە خۆراك و كێشەی گەدەو سەختی خەوتن و خەوزڕان و هەستانەوە لە خەو بەشەوو بەیانی زوو و دەركەوتنی پەڵەی پێست و كێشە لە پێست وەك ئەكزیمای كتوپڕو بێ هۆكارو پەستانی منداڵ لەسەر ددانەكانی و لەیەكخشاندنیان لەكاتی خەوتن، هەستكردن بە ماندووبوون و شەكەتییەكی زۆر بێباكی لە چەند بابەت و شتێك كە روودەدات، هەست نەكردن بە تێربوون تەنانەت دوای خواردنی ژەمێكی گەورەی خۆراك و تووشبوونی منداڵ بە كەمخوێنی بەهۆی كەمی ئاسنەوە ئەوانە هەمووی نیشانەی زەقی بوونی كرمی سكن لە منداڵ و لەكاتی دەركەوتنیان پێویست بە سەردانیكردنی پزیشك و ئەنجامدانی پشكنینی تاقیگەیی دەكات.

چارەسەركردنی كرمی سك لە منداڵ وەك گوترا پێویست بە چوونە لای پزیشكی شارەزاو دەستنیشانكردنی حاڵەتەكەی دەكات و ئینجا وەرگرتنی چارەسەری گونجاو، رەنگە پزیشك چەند جۆرێك پشكنین بۆ منداڵەكە بنووسێت بۆ دیاریكردنی جۆری كرمەكەو دیاریكردنی چارەسەری گونجاو بۆی بۆ رزگاربوونی یەكجاری لێوەی، هەروەها دەتوانرێت لە ماڵەوە بەسەر ئەو كێشەدا زاڵ بیت لە رێگەی چارەسەری سروشتی لەوانە لە رێگەی سیرەوە كە توانایەكی باشی هەیە بۆ رووبەڕووبوونەوەی میكرۆب و مشەخۆرەكان و رزگاربوون لە كرمە جۆراوجۆرەكانی سك، بەكارهێنانیشی رۆژانە دەتوانرێت سێ قاشی خاو سیر بخورێت بۆ ماوەی تەنیا یەك هەفتەو دەبێت لەسەر گەدەی بەتاڵ بخورێت بۆ ئەوەی ئەنجامی باشی هەبێت. 

هەروەها تۆوی كولەكە كە توانای باشی هەیە بۆ رووبەڕووبوونەوەی كێشەی كرمی سك و ریخۆڵە بەهۆی توانای لەناوبردنی میكرۆب و مشەخۆرەكان و بەكارهێنانیشی دوو كەوچك لەو تۆیە بە سپیكراوی و هاڕڕاویەوە لەناو سێ كووپ ئاوی كوڵاودا دادەنرێت و دوای نیو سەعات و ساردبوونەوەی ئاوەكە دەخورێتەوەو رۆژانەو بۆ ماوەی هەفتەیەك بەكار دەهێنرێت، هەروەها سركەی سێوی سووكراوو شەربەتی لیمۆ، ئەوانەش رێژەیەكی زۆری ترشیان تێدایە كە توانای لەناوبردنی كرمەكانیان هەیەو لە ماوەیەكی كورتدا لەناویان دەبەن، كاتێك دوو كەوچكی بچووك لە شەربەت یان ئاوی لیمۆی سروشتی یان سركەی سێو دەخرێتە ناو نیو كووپ ئاوەوەو بەیەكجار دەخورێتەوەو دەتوانرێت رۆژژانەو بۆ ماوەی هەفتەیەك ئەو كارە دووبارە بكرێتەوە، بۆ رزگاربوون لە كرمەجیاوازەكانی سك.

ئەژین عەبدولڵا – هەولێر