بە ئاسانترین ڕێگا چارەسەری خەمۆكی بكە

18/09/2019 - 15:40 بڵاوکراوەتەوە لە هەواڵ/تەندروستی

ملیۆنان كەس لە تەواوی جیهان تووشی خەمۆكی بوون، لەمبارەوە پسپۆرانی خۆراك پێشنیاری چارەسەرییەكی ئاسان دەكەن، كە بریتییە لە خواردنێكی تەندروست بۆ ژەمە نانی بەیانیان.

تۆڕی DWی میدیایی ئەڵمانی، ئەنجامی توێژینەوەیەكی میلیسا برۆنیتی پسپۆری خۆراكی ئەڵمانی گواستووەتەوە، كە باس لە كاریگەرییەكی گەورەی وەرزشكردن و ئەنجامدانی یۆگا و دواتریش خۆراكی تەندروست بۆ ژەمە نانی بەیانی دەكات بۆ چارەسەری خەمۆكی.

میلیسا توێژینەوەكەی لەبارەی پەیوەندیی نێوان سیستەمی خۆراكی و تەندروستی مێشك و دەروونی مرۆڤەوە ئەنجام داوە، لە ئەنجامدا بۆی دەركەوتووە كە خۆراكێكی تەندروست كلیلی دەرگای دەروونێكی دروست و ئارامە. بەتایبەتییش ئاماژە بەخۆراكی ژەمە نانی بەیانی دەكات، كە كاریگەرییەكی گەورەی لەسەر دەستپێكی ڕۆژەكە دەبێت.

توێژەرە ئەڵمانییەكە دەڵێ دەستپێكردنی رۆژەكەت بە ژەمە خۆراكێكی تەندروست تەنها تەندروستی جەستەیی ئەم ڕۆژەت باش ناكات، بەڵكو كاریگەرییەكی باش لەسەر تەندروستیی مێشك و دەروونیش بەجێ دێڵێت.

دەشڵێ باشترین شتیش ئەو خواردنان كە ترشەڵۆكی چەوریان تێدایە، لەگەڵ خواردنەكانی دەوڵەمەندن بە ڤیتامین ب و ڤیتامین د.