ئەگەر تەمەنت گەیشتۆتە 35 ساڵ، ئاگاداری ئەمە بە

دوو شەممە, 12 شوبات 2018 06:28

 

 

نوێترین توێژینەوە دەریدەخات، ئەوە خواردەمەنییە چەورەكانو شیرینەكان نین كە ئاستی كۆلیسترۆڵ بەرزدەكەنەوە، بەڵكو ئەوەی لەوە بەرپرسیارە فاكتەری بۆماوەییە.

لەمبارەیەوە پزیشكی پرۆفیسۆر (یەنیس ئابیر) لە نەخۆشخانەی زانكۆی (هامبۆرگ – ئیبیندرۆف) دەڵێت: بوهێڵەكان بەشێوەیەكی سەرەكی بەرپرسیارن لە بەرزبوونەوەی ئاستی كۆلیسترۆڵ و بەهۆی ئەوەوەیە كە لەشی هەندێك كەس ڕێژەیەكی بەرزی كۆلیسترۆڵ بەرهەم دەهێنێت و تەنها (%10) ی كۆلیسترۆڵی لەش پەیوەندی بەو خۆراكانەوە هەیە كە مرۆڤ دەیانخوات.

گرنگی كۆلیسترۆڵ : كولیسترۆڵ یەكێكە لەماددە گرنگەكانی ناو لەش، چونكە بەشێكە لەدیواری خانەكان و بەهۆی پێویستی بۆ ئەو مادەیە بەردەوام جگەر ئاستی كولیسترۆڵ دەپێوێت و بونیادی نوێ لە رێگەی یاریدەدەرە كیمیاوییەكانەوە پتەو دەكات.

هەروەها هیچ كات كۆلیسترۆڵ زیانبەخش نابێت ئەو كاتە نەبێت كە لەئاستی خۆی زیاتر بێت، لەبەر ئەوەی كۆلیسترۆڵ بە پرۆتین داپۆشراوە، ئەوا گەڕانی بە ناو خوێندا دەتوانێت وای لێبكات كە بەدیواری موولوولەكانەوە بنێشێت و ڕەقبوونی خوێنبەرەكانی لێوە دروست بێت.

ئەو مەترسییانەی كە زۆربوونی كۆلیسترۆڵ لەخوێندا دروستی دەكات بریتییە لەڕەقبوونی خوێنبەرەكان ‌و تووشبوون بە نەخۆشییەكانی دڵ و وەستانی دڵ و مێشك، لە پاڵ فاكتەرە بۆماوەییەكانیش چەند فاكتەرێكی دیكە هەن كە ڕۆڵیان هەیە لەبەرزبوونەوەی كۆلیستڕۆڵی خوێندا، لەوانەش جگەرەكێشان و قەڵەوی و كەمی چاڵاكی جەستەیی و تووشبون بە شەكرەو بەرزبوونەوەی پەستانی خوێن.

لەش پێویستی بەكۆلیسترۆڵە، چونكە گرنگە بۆ بەرهەمهێنانی ڕووپۆشی خانە كە بە بونیادنەری شانەكانی لەش دادەنرێت، هەروەها یەكێكە لەپێكهێنەرەكانی هۆرمۆنەكان لەوانەش هۆرمۆنی ئسترۆجین ‌و تستۆسترۆن ‌و ئەدرنالین، هەروەها بەشێكی سەرەكییە لە سوێرییە زەردەكان واتە ئەو ماددەیەی كە جگەر دەریدەدات، ئەم پرۆسەیە رێژەی (%8) ی ئەو كۆلیسترۆڵە بەكاردەهێنێت كە جگەر دەریدەدات، ئەگەر ڕێگە درا بە كۆلیسترۆڵی زیانبەخش زیاد بكات و بەرز بێتەوە ئەوا كاریگەرییەكانی لەسەر لەش زۆر خراپ دەبێت،
چۆن هاوسەنگی كۆلیسترۆڵ ڕادەگیرێت ؟

بەپێی بابەتێكی رۆژنامەی كوردستانی نوێ‌، پێویستە هەموو كەسێك لەدوای تەمەنی (35) ساڵییەوە بەردەوام ئاگای لەئاستی كۆلیسترۆڵ بێت و ناوبەناو پشكنین بكات، بەپێی ڕادەی ئەو ماددەیەش دەتوانێت پێشگیری لە نەخۆشییەكانی وەك نەخۆشی دڵ و جەڵتەی دڵ و مێشك بكات، هەروەها باشترە ئەوانەی كۆلیسترۆڵیان بەرزە لە خواردنی هێلكەو كەرەو گۆشت دوور بكەونەوە.

 

 

ئـ . كـ