لەبارەی ئیفلیجی قۆڵۆن ئەمانە بزانن

10/01/2019 - 08:41 بڵاوکراوەتەوە لە هەواڵ/تەندروستی

 

 

ئیفلیجی قۆڵۆن نەخۆشیەكی درێژخایەنەو لە هەر پێنج هەزار منداڵێك یەكیان تووش دەبێت، لە كوڕ زیاتر دەردەكەوێت بە ڕێژەی (1.4%)، (د. كارزان كازم) پسپۆڕی نەشتەرگەری منداڵان، هۆكارەكان و چارەسەرییەكانی ڕوون دەكاتەوە.

هۆكاری ئیفلیجی قۆڵۆن:

ئیفلیجی قۆڵۆن حاڵەتێكی زگماكیە بەشێكی ڕیخۆڵە لەكاردەكەوێت بە هۆی نەبوونی خانە دەماری تایبەت بە جووڵەی ڕیخۆڵە، ئەم بەشەی ڕیخۆڵە لە كرژبوونی بەردەوام دەبێت، ناتوانێت پاڵ بە پیساییەوە بنێت و كۆدەبێتەوە.

نیشانەكان :
یەكەم/ تەمەنی دوای لە دایك بوون :

1. دەرنەچوون یان دواكەوتنی ئەو پیساییە ڕەشەی كە هەموو منداڵێك لە ماوەی (4 – 48) سەعات دوای لە دایك بوون دەری دەدات.
2. ڕشانەوەی سەوز یان زەرد.
3. ئاوسان و گەورەبوونی سك.

دووەم/ تەمەنی گەورەتر :

1. قەبزی (دەرنەچوونی پیسایی) بەردەوام.
2. ئاوسان و گەورەبوونی سك.
3. لاوازبوون و دواكەوتنی گەشە.

سێیەم/ دەستنیشانكردن :

1. پرسیاركردنی تەواوی نیشانەكان و پشكنینی لەلایەن پزیشكی پسپۆر.
2. وێنەی تیشكی ڕەنگاو ڕەنگ.
3. وەرگرتنی پارچەیەكی بچووك لە رێكە (مستقیم) بۆ پشكنینی شانەیی.

چوارەم/ چارەسەركردن :

تەنها یەك رێگە هەیە ئەویش لەڕێگەی نەشتەرگەری دەبێت بە لابردنی ئەو بەشەی ڕیخۆڵە كە لە كاركەوتووە.

 

 

ئـ . كـ