چەند تەقینەوەیەك لە بەغدا ژمارەیەك قوربانی لێدەكەوێتەوە

03/08/2016 - 16:29 بڵاوکراوەتەوە لە هەواڵ/عێراقی

 

بەهۆی تەقینەوەی ژمارەیەك بۆمبی چێنراو لە چەند ناوچەیەكی شاری بەغدا، ژمارەیەك قوربانی لێدەكەوێتەوە و بەغدا خوێناوی دەكات.

نەقیب حەسەن نەوفەل ئەفسەر لە پۆلیسی عێراق راگەیاند: كە ئەمڕۆ ژمارەیەك بۆمبی چێنراو لە چەند ناوچەیەكی جیاواز لە شاری بەغدا رویانداو بەهۆیانەوە چوار كەس كوژران و 16ی دیكەش بریندار بوون.

ناوبراو وتیشی: تەقینەوەی یەكەم، لە باشوری بەغدا تەقییەوە و كاروانێكی چەكدارانی حەشدی شەعبی كردە ئامانج و لە ئاكامدا چەكدارێك كوژرا و پێنجی دیكەش بریندار بوون.

بەوتەی ئەفسەرەكە، تەقینەوەی دووەمیش، لە بازاڕێكی میللی باكوری بەغداش، بۆمبێكی چێنراو تەقییەوە كە بووە هۆی كوژرانی دوو هاووڵاتی و برینداربونی 11ی دیكە.

بە وتەی سەرچاوەكە ئاماژەی بەوەشدا، كە تەقینەوەی سێیەمیش لە ناوچەی مەشتەلی خۆرهەڵاتی بەغدا، بۆمبێكی چێنراو كە بە ئۆتۆمبێلی هاووڵاتییەكەوە لكێنرابو، تەقییەوە و بەهۆیەوە دەستبەجێ‌ شۆفێرەكە كوژراوە.

ش.م