ژمارەیەك خێزان لەژێرزەمینی خانووەیەكدا گیریان خواردووە

دوو شەممە, 20 ئازار 2017 13:57

 

بەهۆی ئۆپەراسیۆنەكانی سەربازی دژبە داعش لە بەشی راستی موسڵ، ژمارەیەك خێزان لەژێرزەمینی خانووەیەكدا نزیكەی 30 كاتژمێرە گیریان خواردووە.

رائید فیراس رەسافی ئەفسەر لە هێزەكانی پۆلیسی فیدراڵ رایگەیاند: بەهۆی ئۆپەراسیۆنەكانی سەربازی كە لە ناوچەی كۆن لە بەشی راستی مووسڵ دژی داعش ئەنجام دەدرێن، پێنج خێزان كە لە منداڵ و ئافرەت و پیاو و بەساڵاچوو پێكهاتوون، لەژێرزەمینی خانوویەكدا گیریان خواردووە و هیشتا زیندوون.


ئەفسەرەكە وتیشی: ئەو پێنج خێزانە لەترسی بۆردومانەكان چووبوونە ژێرزەمینی خانوویەك لە گەڕەكی مەیدان بەشی راستی مووسڵ، بەڵام بەهۆی بۆردومانی ئاسمانی و مووشەكی كە چەكدارانی داعشیان كردبووە ئامانج، دەرگای ژێرزەمینەكە بەسەریاندا داخراو و بۆتە هۆی ئەوەی نەتوانن لەژێر زەمینەكە بێنە دەرەوە.


ئەفسەرەكە ئاماژەی بەوەشدا كە ماوەی ٣٠ كاتژمێر دەبێت، هێزەكانی عێراق گوێیان لە هاوار و بانگەوازی ئەو پێنج خێزانەیە بۆ ئەوەی رزگاریان بكەن، بەڵام هێزەكانی عێراق ناتوانن رزگاریان بكەن، چونكە پڕۆسەی رزگاركردنی ئەو پێنج خێزانە لەژێر زەمینەكە پێویستی بەئۆتۆمبێلی تایبەتی فریاكەوتن هەیە و ئەركی دەرهێنانی ئەو خێزانانە لە ئەستۆی تیمی بەرگری شارستانی دایە.

 

ش.م