رایتس وۆچ لەسەر زیندانییەكان، رەخنە لە حكومەتی عێراق دەگرێت

05/07/2019 - 10:01 بڵاوکراوەتەوە لە هەواڵ/عێراقی

 

 

رێكخراوی هیومان رایتس وۆچ ڕایگەیاند، لە عێراق تۆمەتباران لە دۆخێكی نامرۆییدا دەستگیردەكرێن و هێزە ئەمنییەكانیش مامەڵەی خراپ لەگەڵ دەستگیركراوەكاندا دەكەن.

ڕێكخراوەكە لە ڕاپۆرتێكیدا ئاماژەی بەوەكردووە، گرتووخانەكانی پارێزگای نەینەوا هەزاران دەستگیركراوی لەخۆگرتووە، لەكاتێكدا توانای لە خۆگرتنی ئەو ڕێژە زیندانییەیان نییە. 

ئاماژە بەوەشكراوە، لە گرتووخانەكانی عێراقدا هەرزەكاران بەتۆمەتی جیاواز لەگەڵ تۆمەتبارانی دیكەدا دەستگیركراون، هەروەها منداڵان لەگەڵ تۆمەتباراندا لە گرتووخانەكاندا هێڵدراونەتەوە.

هاوكات (لەما فەقیە) بەڕێوبەری رێكخراوەكە لە رۆژهەڵاتی ناوەڕاست بە وەكالەت، داوای لە حكومەتی عێراق كرد دەستبەجێ گرتووخانەكان نۆژەن بكاتەوە یاخود گرتووخانەی نوێ دروستبكات، بۆ ئەوەی دەستگیركراوان بەپێی بنەما نێودەوڵەتییەكانی مافەكانی مرۆڤ بێت. 

بەپێی بەدواداچوونی ڕێكخراوەكە، لە كۆتایی مانگی حوزەیرانی ڕابردوودا، ژمارەی دەستگیركراوانی سێ گرتووخانەی پارێزگای نەینەوا گەیشتۆتە چوار هەزارو (500) كەس، كە لەو ژمارەیە هەزارو (300) تۆمەتبار سزاكانیان بەسەردا ساغكراوەتەوەو دەبوایە بگوێزرێنەوە بۆ زیندانەكانی بەغدا، بەڵام بەشێك لە دەستگیركراوان دوای شەش مانگ لە وەرگرتنی سزاكانیشیان نەگوازراونەتەوە.