لەنیو ساڵی عێراق، 30 هەزار خێزان لەیەكتری جیابوونەتەوە

06/07/2019 - 10:31 بڵاوکراوەتەوە لە هەواڵ/عێراقی

 

 

نزیكەی (30) هەزار حاڵەتی جیابوونەوە لە پێنج مانگی ئەمساڵداو لە عێراقدا تۆماركراوە جگە لە هەرێمی كوردستان، ئەوەش بەپێی ئاماری دادگاكانی عێراق، بەپێی ئامارەكە لە پێنج بۆ چوار حاڵەتی هاوسەرگیری یەكێكیان بە جیابوونەوە كۆتایی هاتووە.

بەپێی ئاماری پێنج مانگی ئەمساڵ، زۆرترین حاڵەتی جیابوونەوە لەشاری بەغدا بووە كە (12) هەزارو (373) حاڵەت بووە، لەكاتێكدا (33) هەزارو (940) پرۆسەی هاوسەرگیری هەر لە بەغداو لە دادگاكان تۆماركراوە، پارێزگای موسەنناش كەمترین حاڵەتی جیابوونەوەی تێدا تۆماركراوە كە (418) حاڵەت بووە.

ناوچەكانی جێناكۆك : ناوچەكانی جێناكۆك لە عێراق، (32) هەزارو (479) حاڵەتی هاوسەرگیری لە دادگاكان تۆماركراوە، پێنج هەزارو (106) حاڵەتی جیابوونەوەش هەبووە.

كەركوك : یەكێكە لە ناوچەكانی جێناكۆك، لە پرۆسەی هاوسەرگیریدا پلەی هەشتەمی پارێزگاكانی عێراقی هەیە بە پێنج هەزارو (966) حاڵەت، بەڵام لە جیابوونەوەدا پلەی دەیەمی وەرگرتووە كە (936) حاڵەت بووە.

نەینەوا : دوای كۆنترۆڵكردنەوەی لەژێر دەستی داعش و گەڕانەوەی زۆرێك لە ئاوارەكانی، پلەی دووەمی وەرگرتووە لە پرۆسەی هاوسەرگیریدا ئەوەش بە (14) هەزار و (479) حاڵەت، بەڵام لە جیابوونەوەدا لە پلەی چوارەمدایە بە هەزارو (628) حاڵەت.

دیالە : بەهەمان شێوە بەشێكی زۆری ناوچەكانی جێناكۆكە لە نێوان هەرێم و ناوەندو بەشێكی گەورەی شەڕی داعش لە سنوری ئەو پارێزگایەدا بوو لە ساڵی (2014) و سەرەتای (2015) لە جیابوونەوەدا پلەی سێیەمی وەرگرتووە بە دوو هەزارو (31) حاڵەت، بەپێچەوانەوە لە پرۆسەی هاوسەرگیردا لە پلەی شەشەمدایە كە شەش هەزارو (837) حاڵەت.

تكریت (سەڵاحەددین) : قەزای دوزخورماتوو و بەشێك لە ناحیەو گوندەكانی جێناكۆكە، دووەم كەمترین حاڵەتی جیابوونەوەی تێدا تۆماركراوە لەنێو پارێزگاكانی عێراق كە (511) حاڵەت بووە، لە پرۆسەی هاوسەرگیریشدا پێنج هەزارو (197) حاڵەت هەبووە لە پلەی دەیەمدایە.

بەگشتی لە تەواوی پارێزگاكانی عێراق، جگە لە هەولێر، سلێمانی و دهۆك، (29) هەزارو (704) حاڵەتی جیابوونەوە لە پێنج مانگی سەرەتای ئەمساڵدا تۆماركراوە، لە كۆی (128) هەزارو (949) حاڵەتی هاوسەرگیری، ئەم ئامارانە لە دادگاكانی عێراق تۆماركراون.

ئەگەر تەنیا ئاماری ئەو پێنج مانگەی ساڵی (2019) وەربگیرێت بە پرۆسەی هاوسەرگیری و جیابوونەوە، ئەوا دەردەكەوێت لە هەر چوار بۆ پێنج حاڵەتێكی هاوسەرگیریدا یەكێكیان بە جیابوونەوە كۆتایی هاتووە.

بەپێی راپۆرتە هەواڵێكی كەركوك ناو، كەمترین حاڵەتی هاوسەرگیری لە عێراق لە نەجەف بووە كە تەنیا سێ هەزار حاڵەت تۆماركراوە.