داعش لە سوریاو عێراق خەریكی خۆ ڕێكخستنەوەن

09/08/2019 - 16:38 بڵاوکراوەتەوە لە هەواڵ/عێراقی

 

 

بەپێی دوو ڕاپۆرتی پنتاگۆن و نەتەوە یەكگرتووەكان، كە ماوەیەك لەمەوبەر بڵاوكراونەتەوە، ئەوە ئاشكراكراوە كە گروپە چەكدارەكانی داعش بە (30) هەزار ئەندامی بیانی هێشتا هەڕەشە دەكات، ڕاپۆرتەكان ئاشكرای دەكەن كە ئەو داعشەی تێكشابوو، سەرلەنوێ گەڕاوەتەوە.

بەپێی وتەی شارەزایان كە بۆ ڕۆژنامەی (L'Echo) ی بەلجیكی قسەیان كردووە ڕایانگەیاندووە، سەرهەڵدانەوەو خۆ ڕێكخستنەوەی چەكدارەكانی داعش هەڕەشەی جدیین.

دوایین مۆڵگەی داعش لە ئازاری (2019) لەلایەن قەسەدەوە تێكشكێندرا، هەرچەندە بشوترێت كە تێكۆشان لەدژی داعش كۆتایی هاتووە، بەڵام ڕاپۆرتەكانی ئەم دواییە ئاشكرای دەكەن كە دۆخەكە جیاوازە، سەرچاوەیەكی دیبلۆماسی بەلجیكی دەڵێت، ئەوە دۆخێكی سورپرایز نییە. چەكدارەكانی داعش هێشتا لە ئەفریقیاو رۆژئاوا چاڵاكن، چەندین دەستەو تیم بەیعەتیان بە داعش داوەو بەوشێوەیە كاری تیرۆریستی دەكەن.

(رەسولۆف گلەنن) سەرپشكنەری ئۆپەراسیۆنی ئینهەرنت كە ئامانجی ئۆپەراسیۆنەكە تێكۆشانە لە دژی داعش لە عێراق و سوریا، لە دووی ئابی (2019) ڕاپۆرتێكی پێشكەشی كۆنگرەی ئەمریكا كردو ڕایگەیاند، چەكدارەكانی داعش لە عێراق هێرشی خۆكوژی دەكەن، خەڵك دەڕفێنن و زەوییەكان دەسووتێنن، لە هەمان ڕاپۆرتدا هاتووە: هەروەها لە سوریا بنكەی ژیانەوەیان دروستكردووە هێزی فەرماندەییان لە عێراق بەرفراون كردووە.

بەپێی ڕاپۆرتی پنتاگۆن (14 – 18) هەزار ئەندامی داعش لە سوریا و عێراق هەن.

(جۆنەتان سپایەر) لێكۆڵەرو پسپۆری داعش لە ئەنستیتیوتی (Jerusalem Institute of Strategy and Security 'JISS') ڕایگەیاند، كاتێك چەند مانگێك لەمەوبەر چووە عێراق بینیویەتی لە دەشتەكانی عێراق داعش خۆی رێكدەخاتەوە، بەبۆچوونی سپایەر دۆخەكە لە باكورو باشوری سوریاش هەمان شێوەیە.

نەتەوە یەكگرتووەكانیش لە (15) ی تەمووزی (2019) ڕاپۆرتێكی هاوشێوەی بڵاوكردبوویەوە.