خۆپیشاندان له‌ به‌غدا ده‌ستی پێكرده‌وه‌، هێزێكی زۆری ئەمنیش لەشارەكەدا بڵاوبونەتەوە

02/10/2019 - 11:10 بڵاوکراوەتەوە لە هەواڵ/عێراقی

بەیانیی ئەمڕۆ خۆپیشاندان و ناڕەزایی لە چەند ناوچەیەكی بەغدا دەستیپێكردەوە، هێزێكی زۆری ئەمنیش لەشارەكەدا بڵاوبونەتەوە.
میدیا جیاوازەكانی عیراق بڵاویانكردەوە، بەرەبەیانی ئەمڕۆ لەچەند ناوچەیەكی بەغدا خۆپیشاندان و نارەزایەتیی دەستیپێكردووەتەوە، لەو چوارچێوەیەدا لە ناوچەی زەعفەرانییە لە باشوری بەغدا لەدوای بانگی بەیانییەوە خۆپیشاندان دەستیپێكردووە و خۆپیشاندەران چوونەتە ئەو شەقامە سەرەكییەی كە ناوچەكە بە ناوەراستی بەغداوە دەبەستێتەوە.
لە باكوری بەغداش لە ناوچەی شەعب بەهەمانشێوە خۆپیشاندان دەستیپێكردووەتەوە و خۆپیشاندەران رێگای سەرەكیی (بەغدا-دیالە)یان داخستووە.
بەوتەی میدیا عیراقییەكان هاوكات لەگەڵ ئەو خۆپیشاندانانە، هێزێكی زۆری ئەمنی لە شارەكە بڵاوبوونەتەوە.
دوێنێ لە بەغدا و چەند شارێكی دیكەی عیراق خۆپیشاندان بەڕێوەچوو، بەشێكیان گرژیی لێكەوتەوە و بەهۆیەوە كەسێك گیانی لەدەستدا و 200 كەسی دیكەش برینداربون، كە نزیكەی 40 لە بریندارەكان سەر بە هێزە ئەمنییەكان بوون.