نوێترین زانیاریی لەسەر خۆپیشاندانەكانی بەغدا لە كوردیو بزانە

03/10/2019 - 13:12 بڵاوکراوەتەوە لە هەواڵ/عێراقی


لەدوای ئەوەی لە چەند ڕۆژی ڕابردوودا خۆپیشاندان بەشێك لە پارێزگاكانی عێراقی گرتەوە، لەئێستادا خۆپیشاندان لە بەغدا ئاڕاستەیەكی ناڕونی هەیەو بەهۆی داخستنی سەرجەم دەروازەكانی بەغداوە نرخی شمەو خۆراك بەرزبوەتەوە.

 

كاتژمێر نۆی سەرلەبەیانی ئەمڕۆ پێنج شەممە 3-10-2019، خۆپیشاندان لە چەند ناوچەیەكی بەغدا دەستی پێكردەوە، بەهۆی ڕاگرتنی هێڵەكانی ئینتەرنێت كە لەكاتژمێر نۆی شەوی ڕابردووە ڕاگیرا، پەرتەوازەبوون بە خۆپیشاندانەكانەوە دەبینرێت، چونكە ڕێكخەرانی خۆپیشاندەران و چالاكوانان لەڕێگەی تۆڕۆی كۆمەڵایەتی فەیسبوكەوە ئاڕاستەی خۆپیشاندانەكانیان دیاری دەكردو سەرجەم جموجوڵەكانیان بڵاودەكردەوە.

 

هەروەها لەگەڵ دەستپێكردنەوەی خۆپیشاندانەكان لە بەغدا، تا ئێستا خۆپیشاندانەكان نەگەیشتونەتە گۆڕەپانی تەحریرو لەلایەن هێزێكی ئەمنی زۆرە ڕێگەنادرێت خۆپیشاندەران بچنە ئەو ناوچەیە.

 

بەمەبەستی ڕێگریكردن لەفراوانبونی خۆپیشاندانەكە لەكاتژمێر نۆی شەوی ڕابردوو هاتوچۆ لەڕێگای ئۆتۆمبێلەوە قەدەغەكراوەو ڕێگە بەهاتوچۆ بۆ ناو بەغداو بەپێچەوانەوە بۆ دەرەوەی بەغدا نادرێت، بەو هۆیەوە بەیانی ئەمڕۆ نرخی شمەك و خۆراك بەڕێژەیەكی بەرچاو بەرزبوەتەوە، بۆنمونە كیلۆیەك تەماتە لە 750 دینارەو بۆ دوو هەزار دینار بەرزبوەتەوە.

 

هەرەوەها هێزێكی ئەمنی زۆر لە دژە تیرۆر و سوپاس و هێزەئەمنیەكانی دیكە بڵاوەیان پێكراوەو دەروازەكانی ناوچەی سەوز داخراون و هاوڵاتی ئاسایی ناتوانێت بە ناوچەی سەوزدا تێپەڕێت.

 

لەئێستادا خۆپیشاندەران لە بەغدا كێشەیەكی سەرەكیان هەیە، ئەویش ئەوەیە ڕێگەیان پێنادرێت و ناتوانن لە یەك شوێن یەك بگرن و ناڕەزایی دەرببڕن.

 

هەروها بەپێی وایین ئامار تا ئێستا نزیكەی 15 خۆپیشاندەران كوژراون و 396 خۆپیشاندەریش بریندارن و نزیكەی 100 ڕێكخەری خۆپیشاندەران دەستگیركراون.