ئەنفلۆزای باڵندە گەیشتە موسڵ

10/12/2019 - 10:47 بڵاوکراوەتەوە لە هەواڵ/عێراقی



لە شاری موسڵ، پەتای ئەنفلۆزای باڵندە بڵاوبۆتەوه و لەو بارەیەوە بەرێوەبەری تەندروستی نەینەوا ڕایدەگەیەنێت: تەنیا لە 24 كاتژمێری رابردودا، بەوهۆیەوە هاوڵاتییەك گیانی لەدەستداوە و دوو كەسی تر رەوانەی نەخۆشخانە كراون.

 

لەدوای ئەوەی لە ماوەی چەند ڕۆژی ڕابردوودا میدیاكانی ئێران بڵاویان كردەوە كە پەتای ئەنفلۆزای باڵندە لەبەشێك لە ناشاروشارۆچكەكانی ئێران بڵاوبۆتەوە، یەكشەممە 8ی كانونی یەكەم چوار نەخۆش بە گومانی پەتای ئەنفلوەنزای باڵندە رەوانەی نەخۆشخانەكانی موسڵ كراون و دوای پشكنین دەركەوتووە توشبون بەو پەتایه، هەر لە نەخۆشخانەش یەكێكیان گیانی لەدەستداوە.

 

جاسم مەعماری، بەڕێوەبەری تەندروستی نەینەوا بە كەركوك ناوی وت: چوار حاڵەت بە گومانی پەتاكە لە نەخۆشخانەی ئیبن سینای موسڵ تۆماركراون و لە نەخۆشانی تر جیاكراونەتەوە، دواتر دوانیان گیانیلەدەستداوە و پشكنینەكانی رەوانەی بەغدا كراوە .

 

 

ئەنفلوەنزای باڵندە، زۆرترینیان بەهۆی ڤایرۆسەكانی جۆری (H5N1) و (H7N9) توشی مرۆڤ دەبن، نەخۆشییەكی كوشندەیە و لە چەند رۆژێكدا نیشانەكانی دەردەكەون لەوانە كۆكەی زۆر، تا، هەوكردنی قوڕگ، ئازار لە جومگەكان، گێژبون و تەنگەنەفەسی.

 

بەرێوەبەری تەندروستی نەینەوا رونیكردەوە ئەو هاوڵاتییەی بەهۆی پەتاكەوە گیانیلەدەستدا، ئەندازیارێكی تەمەن 33 ساڵە و دوو كەسەكەی دیكەی نەخۆشخانەش، دوای گەڕانەوەی پشكنینەكانیان دەركەوت هەمان پەتایان هەیە.

 


لە هەنگاوەكانی خۆپاراستن لە پەتای ئەنفلۆزا، شتنی دەستەكان بە ئاوو سابون، بەكارهێنانی دەمامك لەكاتی كۆكە و پژمین، دوركەوتنەوە لە شوێنی قەرەباڵغ، كردنەوەی دەرگا و پەنجەرەی شوێنی كار و مانەوە بۆ هەواگۆڕكێ، دوركەوتنەوە لە تەوقەكردن و لە ئامێزگرتن، دوركەوتنەوە لە كەسی توشبوو.