خۆپیشانده‌رانی عێراق: سه‌در دووڕوو و خیانەتكاره‌

25/01/2020 - 16:04 بڵاوکراوەتەوە لە هەواڵ/عێراقی

لیژنەی ناوەندی باڵای هەماهەنگی خۆپیشاندانەكانی عیراق پەیامێكی توند دەدات بە موقتەدا سەدری ڕابەری ڕەوتی سەدر و تۆمەتباری دەكات بە “دووڕوو و خیانەتكار” و دەڵێت: “ئێمە بە فەتوای ئایینی و تویتی سەدر دەستمان بە خۆپیشاندان نەكردووە و كەس ناتوانێت بەكارمان بهێنێت”.

لیژنەی ناوەندی باڵای هەماهەنگی خۆپیشاندانەكانی عیراق لە بەیاننامەیەكدا كه‌ وێنه‌یه‌كی ده‌ست "كوردیو" كه‌وتوو و ئاڕاستەی موقتەدا سەدری كردووە ئاماژە بەوەدەكات، كە نە بە فەتوای ئایینی دەستمان بە خۆپیشاندان كردووە و نە بە تویتی سەدر، بۆیە موقتەدا و شوێنكەوتووانی ناتوانن گرەو لەسەر كۆتایی هاتنی پشوومان و كۆتایی هاتنی خۆپیشاندانەكان بكەن.

دەشڵێت: “ئەوانەی ویستیان سواری شەپۆلەكەمان ببن سواری شەپۆلەكەیان بووین و ئەوانەش، كە ویستیان بەكارمان بهێنن تێمان پەڕاندن، بۆیە دەمێنینەوە لە گۆڕەپانەكان تاوەكو ئامانجەكانی شۆڕش بەدەست دەهێنین”.

جەختیشی كردۆتەوە، كە خوێنی شەهیدان بەفیڕۆ نادەین و نابینە كارتێك لەسەر مێزی بازرگانی پێوەكردنی سیاسییەكان، هەروەكو سەدر ئەنجامی دەدات.

لیژنەی ناوەندی باڵای هەماهەنگی خۆپیشاندانەكانی عیراق دەلێت: “ئەوەی سەدر دەیكات دووڕوویی و خیانەتە بەرامبەر شۆڕشگێڕان و نرخەكەی سەرۆكایەتی حكومەتی داهاتووە وەكو ئەوەی ئێران بەڵێنی پێ‌ داوە، بۆیە دەمێنێنەوە تاوەكو ەركەوتن بەدەست دەهێنین”.