داعش هێرش دەكاتە سەر گوندێكی حەویجە

هەینی, 12 کانونی دووەم 2018 15:38

 

 

ژنێك و دوو كوڕی لە گوندێكی سنوری حەویجە كوژران، ئەوەش لە ئەنجامی هێرشی ژمارەیەك چەكداری نەناسراوەوە كە بە وتەی سەرچاوە ئەمنییەكان، پاشماوەی داعش بوون.

سەرچاوەیەكی ئەمنی ئاشكرایكرد، ژمارەیەك چەكدار دزەیان كردۆتەوە گوندی فەرحانییە لە نزیك گوندی سەعدییە لە باشوری قەزای حەویجە، پەلاماری خێزانێكیان داوە.

چەكدارەكان هەستاون بە كوشتنی ژنێك بەناوی (خەولە عەبدولڵا) لەگەڵ دوو كوڕیدا كە یەكێكیان ناوی (رەعد فەتاح) ە.

سەرچاوەكە بۆ كەركوك ناو جەختیكردۆتەوە، ئەو چەكدارانە لە پاشماوەو شانەی نوستووی داعش بوون، دوای رووداوەكە هەڵاتوون و هۆكاری ئەوەش، رەنگە ئەوەبێت هەردوو براكە سەر بە یەكێك لە رێكخراوەكانی حەشدی شەعبین.

ماوەیەكە چەكدارانی داعش لە قەزای حەویجە‌ لە باشوری خۆرئاوای كەركوك جموجۆڵیان دەستپێكردۆتەوەو مەترسین بۆ سەر گوندنشینان، هەرچەندە دوو مانگە ناوچەكە لەژێر دەستی چەكدارەكانی داعشدا دەرهێنراوەو ناوبەناو ئاوارەكان بۆ زێدی خۆیان بۆ ئەو ناوچەیە دەگەڕێنرێنەوە.

 

ئـ . كـ