پنتاگۆن : عێراق ڕێككەوتنی وەرگرتنی تانكی ئەبرامزی پێشێل كردووە

شەممە, 10 شوبات 2018 06:48

 

 

وەزارەتی بەرگری ئەمریكا رایگەیاند، میلیشیا چەكدارەكانی حەشدی شەعبی چەك و جبەخانەی وڵاتەكەیان بەكارهێناوە، لەنێویشاندا تانكی سەربازی ئەبرامز.

(ئێریك باهۆن) وتەبێژی پنتاگۆن بۆ رۆژنامەنووسان رایگەیاندووە، واشنتۆن تانكی ئەبرامزی بە حكومەتی عێراقی فرۆشتووە، كەچی ئێستا لەدەستی چەكدارەكانی حەشدی شەعبیدایە.

بەپێی ڕێككەوتنی نێوان بەغداو واشنتۆن، دەبێت ئەو چەك و جبەخانەو چەكو قورسانە تەنها لەدەستی سوپای عێراقیدا بێت، بەڵام ئێستا بۆیان دەركەوتووە كە ئەو چەكانە لەدەست چەكدارەكانی حەشدی شەعبیەو بۆ مەبەستی تر بەكارهێندراوە.

بەپێی راپۆرتە هەواڵەكە، ئێستا حەشدی شەعبی دەسەڵاتی بەسەر زۆربەی جومگەكانی دەسەڵاتدا گرتووە كە ئەوان نزیكن لە ئێران.

هەروەها دوای بڵاوبوونەوەی بەڵگەكانی بەكارهێنانی تانكی ئەبرامز لەلایەن چەكدارەكانی حەشدی شەعبی، ئێستا كۆمپانیای (ژەنەرال دینامێكس) كارەكانی چەككردنەوەی ئەو تانكەی راگرتووە.


جێگەی باسكردنە لەمانگی تشرینی دووەمی رابردوودا هێزەكانی سوپای عێراق و میلیشیاكانی حەشدی شەعبی پەلاماری سنوورەكانی هەرێمی كوردیستانیانداو لەشارۆچكەی پردێی باشووری شاری هەولێر تانكێكی ئەبرامزیان شكێندرا، ئەوەش دەنگۆی زۆری بەدوای خۆیدا هێنا.

 

ئـ . كـ